Declan Rice tregon inspirimin për festimin e tij

Declan Rice ka zbuluar arsyet pas festimit të tij për golin ndaj Burnleyt të shtunën, pas ndarjes nga jeta të një anëtari të dashur të familjes.

Rice shënoi golin e dytë të Arsenalit në fitoren 2-0 në “Turf Moor” në minutën e 35-të.

Pas golit, mesfushori anglez u gjunjëzua në tokë dhe ngriti duart drejt qiellit, duke ia kushtuar golin të ndjerës të tij, tezes Bev.

Pas ndeshjes, Rice i bëri homazh tezes së tij, e cila ka qenë mbështetëse e madhe e karrierës së tij:
“Tezja ime vdiq para ndeshjes me Fulham. E dua shumë. Ajo udhëtonte gjithkund për të më parë me mamin tim. E di që po më shikon nga lart, kështu që ky ishte për të sot”.

Arsenal kishte fituar 1-0 ndaj Fulham më 18 tetor, ndeshje në të cilën Rice luajti, që do të thotë se ajo ndodhi pak më shumë se dy javë më parë.

Rice shprehu dashurinë për tezen edhe në “Instagram” pas fitores ndaj Burnleyt.

Ai ndau një foto ku shihen duke u përqafuar në “Emirates Stadium”, me mbishkrimin: “Kjo ishte për ty sot Bev, e di që po më shikon nga lart! Të dua për gjithmonë.” Postimi përfshinte edhe një emoji zemre.

Fitorja e së shtunës vendos Arsenalin me 25 pikë pas 10 ndeshjesh në Premierligë dhe zgjat serinë e fitoreve në nëntë ndeshje në të gjitha garat.

Ata synojnë të arrijnë dhjetë fitore radhazi të martën, kur udhëtojnë në Slavia Prague për Ligën e Kampionëve.

Duke folur për formën e tij dhe të skuadrës, Rice e lidhi suksesin me fokusin: “Jam shumë i fokusuar, brenda dhe jashtë fushës. Çdo fundjavë e di sa e rëndësishme është të fitosh ndeshjet e futbollit. E kuptoj pozicionin tonë dhe atë që mund të arrijmë si klub. Po bëj gjithçka që mundem, brenda dhe jashtë fushës, për të përgatitur veten dhe skuadrën për të fituar ndeshje”.

“Ne kemi gjithmonë një qëllim në këtë skuadër këtë sezon dhe ai është të japim gjithçka për tifozët dhe për njëri-tjetrin, dhe do të vazhdojmë ta bëjmë këtë.

Një ndeshje në një kohë. Jam shumë i lumtur me nivelin e lojës sime. Gjysma e parë ishte shumë, shumë e mirë.

Mund të kishim shënuar tre apo katër gola. Gjysma e dytë nuk ishte performanca jonë më e mirë, por tregoi anën tjetër të lojës ku mund të jemi të fortë, ku mund të mbrojmë me gjithë fuqinë tonë dhe ka vlerë të mos lejojmë gol”, shtoi ai.

“Kemi një unitet dhe bashkëpunim të madh, nuk duam të pësojmë gol, kjo po na fiton ndeshje po aq sa edhe sulmi ynë. Ishte një ndeshje me dy gjysma, por në fund, tre pikët janë ato që kanë rëndësi. Tani kthehemi në shtëpi, rikuperojmë dhe përgatitemi për të martën”, përfundoi Rice.