Kryqëzimi te Parlamenti serb sërish i bllokuar

Pas incidenteve të mbrëmshme pranë ndërtesës së Parlamentit të Serbisë, situata në Beograd është qetësuar, megjithëse trafiku në qendër të qytetit është përsëri i bllokuar.

Kryqëzimi i rrugëve është mbyllur sërish për shkak të grumbullimit të qytetarëve që po mbështesin Dijana Hrkën, nënën e Stefanit, të riut që humbi jetën gjatë shembjes së një tende në Novi Sad.

Hrka ka nisur një grevë urie, të cilën e ka vazhduar edhe sot, duke kërkuar që institucionet “të zbardhin kush e vrau djalin e saj dhe 15 personat e tjerë”, raportojnë mediat serbe.

Sipas këtyre mediave, qytetarë që kundërshtojnë bllokadat janë mbledhur përpara Parlamentit të Serbisë, ndërsa një kordon policie ndan dy grupet për të shmangur përplasjet.

Gjatë mëngjesit, pjesëmarrësit në protestë mbajtën gjashtëmbëdhjetë minuta heshtje në nder të viktimave të shembjes së tendës në Novi Sad.

Sipas njoftimit të Ministrisë së Brendshme dhe Agjencisë për Siguri dhe Informim (BIA), mbrëmë një grup pjesëmarrësish në një tubim të paregjistruar ka sulmuar qytetarë që ndodheshin në një tubim të regjistruar në Parkun Pionirski, duke hedhur objekte dhe piroteknikë. Në atë rast, një tendë u përfshi nga flakët, ndërsa një polic u plagos lehtë në këmbë dhe mori trajtim në Qendrën e Emergjencës.