Allegri bën tifozët e Milanit të ëndërrojnë

6 fitore, 3 barazime dhe 1 humbje në 10 javë, 21 pikë nga 30 të mundshme.

Në shtëpinë e “djallit” është koha për të bërë llogari, 10 ndeshje janë mjaftueshëm për të dalë në një përfundim, sigurisht jo përfundimtare, por ky është një minicikël që Allegri e kaloi me sukses.

Nga Napoli, Fiorentina e Roma, 3 fitore ndaj 3 rivalëve me peshë, 9 pikë të plota brenda në shtëpi, por Milani i tij nuk ka zhgënjyer as në transfertë, 2 barazime të rëndësishme ndaj Juves dhe Atalantës. Vetëm 1 hap falas në 10 javë, në sfidën e parë ndaj Kremoneses.

Këto janë shifrat e Alegrit në këtë rikthim të tij në Milano, e të mendosh që këtë valë të parë Alegri e kaloi duke bërë llogari me shumë mungesa të rëndësishme. Pjesën më të madhe të këtij fillim sezoni e ka kaluar në kushte emergjence, pa lojtarë si Pulisiç, Rabiot, Loftus-Cheek, Estupinan, Tomori, Salemakers, Nkunku, Jashari etj, por sërish nuk u dorëzua duke mbajtur hapin e ekipeve si Napoli, vetëm një 1 pikë larg kreut dhe po aq sa Inter, 21 pikë.

Alegri dhe stafi i tij, kërkojnë dhe një sforco të fundit nga lojtarët, të kalojnë me sukses edhe sfidën kundër Parmës, por të përgatitur më pas me qetësi derbin kundër Interit. Pauza që sjellin ekipet përfaqësuese i jep kohën e duhur për të rikuperuar plotësisht të gjithë grupin e lojtarëve.

Në fillim, kur Alegri zbarkoi në Milano, objektivi kryesor i vendosur nga drejtuesit e klubit ishte rikthimi në Champions League, por ky objektiv me sa duket i rri ngushtë tifozëve të “djallit”, në sytë e tyre, referuar edhe këtij fillimi sezoni, ku ekip mund të konkurrojë me kohë të plotë në garën për titull në Serie A. Për këtë çështje u pyet edhe presidenti Scaroni:

“A është ky Milan për titull? Këtë nuk e di, por di të them që ky Milan të bën që zemra të rrahë fort”, u shpreh bosi kuqezi. Sigurisht është ende herët të flitet për titull, por pa diskutim ky ekip i ka të gjithë mjetet për ta luajtur këtë lojë.