Liverpooli i bashkohet Arsenalit dhe Chelsea-t në garën për ‘yllin’ e Juventusit

Liverpool është futur në garë për të transferuar sulmuesin e talentuar të Juventusit, Kenan Yildiz, duke iu bashkuar rivalëve të Premier League, Arsenal dhe Chelsea, të cilët po ndjekin nga afër 20-vjeçarin turk. Yildiz është shndërruar në një nga talentet më premtues të Serisë A pas shpërthimit të tij gjatë sezonit të kaluar.

Pavarësisht se Juventusi refuzoi një ofertë prej 65 milionë eurosh nga Chelsea gjatë verës, bisedimet për rinovimin e kontratës vazhdojnë, pasi lojtari kërkon një rritje të ndjeshme page, të ngjashme me nivelin e Jonathan David.

Klubi bardhezi, nën drejtimin e Luciano Spalletti-t, mbetet i bindur se do ta sigurojë rinovimin e turkut deri në vitin 2030, duke e konsideruar atë si pjesë të rëndësishme të projektit afatgjatë.

Megjithatë, nëse palët nuk arrijnë një marrëveshje, Liverpooli dhe disa gjigantë të tjerë anglezë janë gati të ndërhyjnë me oferta konkrete.

Me tre gola dhe katër asistime në 13 paraqitje deri më tani këtë sezon, numri 10 i Juventusit po vazhdon të tërheqë interes të madh nga klubet më të mëdha të Evropës.