Messi flet për Botërorin e vitit të ardhshëm

Ylli i Inter Miami dhe legjenda e Barcelonës, Lionel Messi, ka folur për mundësinë e pjesëmarrjes së tij në Kupën e Botës dhe për momentin kur mund të tërhiqet nga futbolli.

38-vjeçari së fundmi ka nënshkruar një rinovim kontrate me klubin amerikan deri në vitin 2028, kohë kur ai do të jetë në të dyzetat.

Messi bëri bujë këtë javë në Barcelonë pasi u rikthye fshehurazi në “Camp Nou”, pa dijeninë e klubit. Në një intervistë për gazetën Sport, ai shpjegoi gjithashtu se ai dhe familja e tij po e konsiderojnë mundësinë e rikthimit për të jetuar në kryeqytetin katalanas.

Megjithatë, duket qartë se Messi ndodhet në periudhën e fundit të karrierës së tij.

Edhe pse kapiteni i Argjentinës siguroi se ende ka dëshirë të madhe për të fituar, ai pranoi se presioni dhe kërkesat në Major League Soccer janë më të ulëta. Sa i përket daljes në pension, Messi tha për Sport se ende po e shijon futbollin:

“Jam i lumtur me mënyrën si kanë kaluar këto vite, dhe për sa kohë që mundem dhe ndihem mirë fizikisht, do të vazhdoj të luaj në të njëjtën mënyrë — duke u përpjekur të konkurroj, të fitoj dhe të jap gjithmonë maksimumin. Në momentin që do të ndiej se nuk jam më në gjendje fizike, se po vuaj në fushë ose që nuk po e shijoj më, atëherë do të jetë momenti për ta lënë. Por tani për tani, po e shijoj, ndihem mirë, dhe aty jam.”

Pyetja tjetër e madhe për të ardhmen e Messit është Kupa e Botës 2026. Ai ka lënë të kuptohet më herët se nuk është i sigurt nëse do të marrë pjesë, pas asaj që u duk si një ndeshje lamtumire në Buenos Aires më herët gjatë vitit.

“Po, sigurisht që është një Botëror i veçantë. Është gjithmonë diçka e veçantë të luash me kombëtaren, të jesh pjesë e kompeticioneve të rëndësishme dhe zyrtare, sidomos duke pasur parasysh se çfarë përfaqëson një Kupë Bote, dhe sidomos pasi e kemi fituar atë. Por, siç e kam thënë, nuk dua të jem një barrë për ekipin. Dua të ndihem mirë fizikisht, të jem i sigurt se mund të ndihmoj dhe të kontribuoj për grupin.”

“Sezoni ynë është ndryshe nga ai europian.

Do të kemi një periudhë përgatitore ndërmjetëse, pak ndeshje përpara Botërorit, dhe do të shohim ditë pas dite nëse ndihem mjaftueshëm në formë për të qenë aty ku dua dhe për të marrë pjesë.

Por sigurisht që jam i vetëdijshëm se është një Botëror, është diçka e veçantë, dhe është kompeticioni më i madh që ekziston. Kështu që jam i emocionuar, por po e marr me qetësi, ditë pas dite.”

Messi do t’i bashkohet sot kombëtares së Argjentinës në Alicante, pas vizitës së shkurtër në Barcelonë, megjithatë ai ka munguar në katër nga shtatë ndeshjet e fundit me përfaqësuesen këtë vit. Këtë sezon, ai ka arritur gjithsesi të shënojë 42 gola dhe të japë 20 asistime në 46 paraqitje me Inter Miamin.