Barcelona e ‘shpërblen’ yllin e saj me rritje të ndjeshme page

Drejtuesit e kampionëve të La Ligës, Barcelona, janë gati t’i ofrojnë një kontratë të re dhe të përmirësuar talentit të mesfushës, Marc Casadó.

Kjo vjen ndërsa 22-vjeçari vazhdon të dëshmojë rëndësinë e tij si një figurë kyçe në skuadrën e Hansi Flick.

Rinovimi i Casadó ka qenë prej kohësh në tryezë në kryeqytetin katalanas.
Në fakt, më herët këtë vit, përfaqësuesit e mesfushorit spanjoll kishin negociuar plotësisht kushtet e marrëveshjes së re, e cila do të zgjaste deri në verën e vitit 2030.

Megjithatë, në fund, Deco dhe bashkëpunëtorët e tij nuk e formalizuan marrëveshjen në zyrat e “Camp Nou”.

Nga ana e tij, Casadó ka ndërruar tashmë përfaqësues, dhe çështjet e tij jashtë fushës tani menaxhohen nga super-agjenti Jorge Mendes.
Për këtë arsye, kushtet e kontratës së re do të duhet të rinegociohen nga fillimi.

Gjithsesi, mesfushori defensiv nuk ka arsye për t’u shqetësuar, pasi sipas Diario Sport, plani i Barcelonës është ta shpërblejë Casadó për kontributin e tij të vazhdueshëm me një rritje të ndjeshme page.