Mbetet vetëm një pengesë e fundit

Rikthimi i Barcelonës në ‘Spotify Camp Nou’ po afrohet më shumë se kurrë, pas më shumë se dy vitesh e gjysmë në ‘Estadi Olímpic Lluís Companys’.

Dokumentacioni i paraqitur nga klubi është miratuar dhe Bashkia e Barcelonës pritet të kryejë inspektimin final të stadiumit të rinovuar në ditët në vijim.

Nëse teknikët japin dritën jeshile pas verifikimit të plotë të dokumenteve, tribuna anësore do të rihapet, duke rritur kapacitetin nga 27 mijë (Faza 1A) në 45 mijë spektatorë.

Ndeshja e La Ligës e 22 nëntorit ndaj Athletic Club mbetet e planifikuar të luhet në ‘Montjuïc’, por një inspektim pozitiv do të hapte rrugën për një rikthim të pjesshëm në ‘Camp Nou’ para fundit të vitit.

Departamenti i planifikimit urban është pengesa e fundit, pasi Barcelona e trajnerit Hansi Flick i ka përmbushur tashmë të gjitha kërkesat komunale.

Nëse gjithçka shkon sipas pritshmërive, tifozët do të kenë mundësinë të kthehen në shtëpinë e tyre historike shumë shpejt.