Marco Reus drejt rinovimit me LA Galaxy

Marco Reus është pranë zgjatjes së kontratës me LA Galaxy, me palët që po finalizojnë bisedimet për një marrëveshje të re që do ta mbajë gjermanin në Los Angeles deri në fund të qershorit 2027.

Aktualisht, kontrata e tij është e vlefshme deri në fund të vitit 2026, por sipas “Sport Bild”, po diskutohen detajet për shtimin e një viti tjetër.

Dirk Hebel, këshilltari afatgjatë i Reus për më shumë se dy dekada, ka konfirmuar se negociatat po ecin shumë mirë:

“Jemi në bisedime shumë pozitive me Galaxy. Marco Reus dhe Los Angeles janë një kombinim perfekt.

Të dyja palët duan ta vazhdojnë dhe ta zgjerojnë bashkëpunimin e suksesshëm,” tha ai.

Reus, 36 vjeç, iu bashkua LA Galaxy-t gjatë sezonit të MLS 2024, pas largimit nga Borussia Dortmund, ku kaloi më shumë se një dekadë.

Ai pati një ndikim të menjëhershëm në ekip, duke ndihmuar klubin e bregut perëndimor të fitonte kampionatin e MLS në vitin e tij të parë.

Në 39 paraqitjet e tij deri tani, Reus ka shënuar nëntë gola në të gjitha kompeticionet, mes tyre pesë gola dhe tetë asiste në 21 ndeshje të MLS-së gjatë sezonit 2025.

Edhe pse LA Galaxy nuk arriti të siguronte kualifikimin në play-off këtë sezon, performancat individuale të gjermanit kanë qenë të qëndrueshme dhe mbresëlënëse.

Reus aktivizohet kryesisht si trekuartist, por mund të luajë edhe në të dy krahët e sulmit, duke i ofruar Galaxy-së një fleksibilitet të vlefshëm dhe kreativitet të vazhdueshëm në fazën ofensive.

Rinovimi i tij pritet të zyrtarizohet së shpejti, duke vulosur kështu vazhdimin e një aventure shumë produktive në futbollin amerikan.