Berardi ‘zbulon’ ëndrrën për të luajtur te një klub i madh

Në një intervistë për “Corriere dello Sport”, sulmuesi afatgjatë i Sassuolos, Domenico Berardi, foli hapur për karrierën e tij, duke konfirmuar se pavarësisht mirënjohjes së thellë për klubin aktual, ai ende mban ambicien për të bërë hapin përfundimtar drejt një skuadre të nivelit të lartë dhe për të përjetuar futbollin e Ligës së Kampionëve.

Berardi, i cili prej vitesh është subjekt i spekulimeve të merkatos verore, deklaroi se vitet e fundit ka shtyrë aktivisht për një largim nga Sassuolo.

“Kam qenë te Sassuolo për pesëmbëdhjetë vite,” tha Berardi.

“Në vitet e para, nuk e ndjeja veten gati të largohesha. Në pesë apo gjashtë të fundit, kam shtyrë që të ikja”, shtoi ai.

Anësori konfirmoi se kishte qenë pranë një transferimi para se një dëmtim t’i prishte planet: “Jam i sinqertë, po. Para se të dëmtohesha, kisha arritur marrëveshje me një klub të madh, të gjitha kushtet ishin identifikuar.

Të gjitha. Por mos më pyesni se cili klub, sepse nuk do t’ju them”.

Kur u pyet nëse klubi kishte vija në fanellë (duke nënkuptuar Juventusin ose Interin), ai pohoi: “Një klub me vija”.

Berardi shprehu më pas pendimin e tij më të madh: “Më erdhi keq që nuk munda të luaja në Ligën e Kampionëve, që nuk munda të luftoja për objektivat më të larta. LK-ja është diçka që gjithmonë kam dashur ta provoj”.

Ai shpjegoi më tej kompleksitetin e një transferimi, duke theksuar se gjithmonë mungonte pjesa e fundit e mozaikut: “Duhet të jenë të tre palët dakord, dhe gjithmonë njëra nga të treja ka munguar”.

Megjithë zhgënjimin, Berardi shprehu mirënjohje për Sassuolon, duke pranuar se ai ndihet dhe trajtohet si simboli i klubit.

“Kam ende kohë,” tha Berardi, duke ruajtur shpresën për lëvizjen që ka dëshiruar prej vitesh. Ai theksoi se tani është plotësisht i pjekur dhe gati për të bërë hapin drejt një klubi elitar.