Diplomacia me dy fronte: Zelensky në Turqi, zyrtarët e Trump në Kiev

Presidenti ukrainas Volodymyr Zelensky nisi një raund të ri përpjekjesh për paqe të mërkurën, duke zhvilluar bisedime në Turqi, ndërsa Sekretari i Ushtrisë Amerikane, Dan Driscoll dhe gjeneralë të lartë amerikanë mbërritën në Kiev në një mision paralel nga administrata Trump për të ringjallur negociatat si me Kievin ashtu edhe me Moskën.

Zelensky mbërriti për një vizitë pune në Turqi të mërkurën, ku u prit në aeroport nga Sekretari i Këshillit të Sigurisë dhe Mbrojtjes Kombëtare, Rustem Umerov, raportoi zëvendëskryetari i bashkisë së Ankarasë, Faruk Keyluoglu në X.

Videoja nga mbërritja e Zelensky tregon zyrtarët turq duke përshëndetur presidentin ukrainas në kryeqytet.

Umerov, i cili udhëtoi në Turqi një ditë më parë në një udhëtim pune, shfaqet gjithashtu në pamjet filmike.

Zelensky është planifikuar të zhvillojë bisedime me presidentin turk Recep Tayyip Erdogan dhe Steve Witkoff, të dërguarin special të presidentit amerikan Donald Trump, më vonë të mërkurën.

Të martën, Zelensky njoftoi një seri takimesh të rëndësishme ndërkombëtare këtë javë, përfshirë bisedimet e së mërkurës në Turqi.

Ai tha se diskutimet do të përqendrohen në intensifikimin e përpjekjeve diplomatike dhe prezantimin e propozimeve të fundit të Ukrainës te partnerët e saj.

Zelensky theksoi se përfundimi i luftës dhe sigurimi i kthimit të të burgosurve ukrainas mbeten përparësi kryesore, duke shtuar se Ukraina po përgatit zgjidhje të reja për të çuar përpara negociatat dhe për të rifilluar shkëmbimet e të burgosurve.

Shefi i zyrës së Reuters në Moskë, Guy Faulconbridge, raportoi në X se Witkoff do ti bashkohet Zelensky-t për bisedimet në Turqi, duke cituar një burim turk.

Në të njëjtën kohë, The Wall Street Journal (WSJ) raportoi se Trump ka dërguar një delegacion të lartë nga Departamenti i Mbrojtjes i SHBA-së në Kiev.

Duke cituar zyrtarë të lartë amerikanë, ky veprim përfaqëson përpjekjen e fundit të administratës për të ringjallur negociatat për përfundimin e luftës.