Yamal: Nuk ka limite, këtë sezon dua të fitojmë gjithçka!

Pavarësisht një periudhe të vështirë për shkak të problemeve me pubalgjinë, Lamine Yamal shikon drejt sezonit 2025-2026 me ambicie gjigante.

Ylli i Barcelonës, së fundmi i shpallur nga gala e Marca-s si lojtari më i mirë i sezonit përpara emrave si Mbappé dhe Vinicius, u vlerësua me trofeun prestigjioz “Di Stéfano”.

I sigurt në objektivat e tij, ai deklaroi: “La Liga, Champions, Botërori, Topi i Artë? I dua të gjitha. Është e mundur.”

Yamal e konsideroi çmimin e marrë si dëshmi të progresit të tij të vazhdueshëm:

“Ky trofe tregon se kam bërë një sezon të madh, si me ekipin ashtu edhe personalisht. Më jep kënaqësi dhe krenari.

Të mbledhësh trofe në këtë moshë është shumë pozitive. Do të vazhdoj të punoj për të arritur objektivat e mi.”

Optimist është edhe për rikthimin në Camp Nou, tashmë shumë afër pas kohës së kaluar në Montjuic: “Të luanim në një stadium që nuk ishte ynë nuk ishte e lehtë.

Tifozët janë thelbësorë. Camp Nou do të na japë një shtysë të jashtëzakonshme për pjesën tjetër të sezonit”.