Luis Díaz pezullohet tri ndeshje në Champions League

Sipas raportimeve të ‘Sport Bild’, Bayerni i Mynihut do të mbetet pa Luis Díaz për tri ndeshjet e ardhshme të Champions League-s. Lajmi është konfirmuar edhe nga Reuters, ndërsa është pasqyruar gjerësisht nga burime pranë klubit bavarez.

Sulmuesi kolumbian është dënuar me pezullim të trefishtë pas kartonit të kuq të marrë kundër Paris Saint-Germain, një vendim shumë më i ashpër sesa pritej. Bayerni kishte parashikuar maksimumi një ndeshje pezullim, prandaj klubi ka kërkuar menjëherë arsyetimin zyrtar me shkrim nga UEFA për të nisur procesin e apelimit.

Vendimi është cilësuar si i rëndë, sidomos duke marrë parasysh se ndërhyrja e Díaz-it është gjykuar nga organet disiplinore si e panevojshme dhe e pajustifikueshme.

Për Bayern-in, mungesa e kolumbianit për tri ndeshje do të jetë një goditje e madhe. Díaz ka qenë ndër lojtarët më të mirë të skuadrës këtë sezon, duke sjellë shpejtësi, kreativitet dhe gola në situata vendimtare.

Tani, trajneri bavarez do të duhet të mbështetet te alternativa të tjera si Lennart Karl dhe Nicolas Jackson, të cilët mund të përfitojnë hapësirë më të madhe në formacion.

Bayerni ende ka të drejtën e apelimit, por mbetet për t’u parë nëse vendimi i UEFA-s do të ndryshojë.