KE nis procedurat kundër Sllovakisë për ndryshimet kushtetuese

Komisioni Evropian ka nisur procedura kundër Sllovakisë dhe kryeministrit të saj nacionalist, Robert Fico, për një ndryshim të kontestuar kushtetues.

”Shteti po shkel parimin që ligji i BE-së ka përparësi mbi ligjin kombëtar”, tha sot një zëdhënës i komisionit.

Sllovakia ka tani dy muaj kohë për t’u përgjigjur kërkesës së Komisionit Evropian.

Ndryshimi kushtetues në Sllovaki, i cili ka hyrë në fuqi më 1 nëntor, përcakton se vendimet mbi ”çështjet kulturore dhe etike si arsimi, jeta familjare dhe gjuha”, në të ardhmen ”do të jenë ekskluzivisht kompetencë e legjislacionit kombëtar”.

Fico e prezantoi ndryshimin në janar dhe ai u miratua nga parlamenti në fund të shtatorit.

”Na vjen keq që shqetësimet e shprehura nga Komisioni nuk janë marrë parasysh nga autoritetet sllovake”, tha zëdhënësi i Komisionit Evropian.

”Nuk mund ta imagjinoj që ndonjë organizatë ndërkombëtare mund të na diktojë sa gjini ka, kush mund të martohet dhe kush jo. Kjo është një çështje krejtësisht e brendshme. Është një komponent shumë i fortë i identitetit kombëtar”, kishte thënë në fillim të nëntorit kryeministri Fico duke injoruar kritikën e pritur nga Brukseli.

Ndryshimi kushtetues gjithashtu vendos kufizime mbi të drejtat e personave transgender dhe çiftet e së njëjtës gjini.

Ndryshimi përcakton gjithashtu se vetëm çiftet e martuara do të lejohen të adoptojnë fëmijë, duke përjashtuar praktikisht çiftet e së njëjtës gjini, pasi në Sllovaki nuk ekziston martesa për të gjithë.

Megjithatë, procedurat e BE-së, që janë nisur tani, kufizohen vetëm në dispozitat mbi përparësinë e ligjit kombëtar mbi ligjin evropian.