Copenhagen korr fitoren e parë, Pafos i merr pikë Monaco-s

Copenhagen arriti fitoren e parë në fazën e ligës së Champions League këtë sezon, duke triumfuar 3-2 ndaj Kairat Almaty në një ndeshje me shumë emocione dhe gola.

Copenhagen zhbllokoi ndeshjen në pjesën e parë, kur Viktor Daðason shënoi me kokë pasi portieri Anarbekov kishte devijuar goditjen e Robert Silvës.

Në minutat e para të pjesës së dytë, Kairat ishte pranë barazimit me një volej të Tapalov që u ndal nga shtylla, por pak më vonë Copenhagen fitoi penallti pas një prekjeje me dorë në zonë. Jordan Larsson shënoi saktë nga pika e bardhë për 2-0.

Danezët e çuan rezultatin në 3-0 në minutën e 73-të, kur goditja e Robert u devijua dhe përfundoi në rrjetë.

Kairat reagoi me dy gola në fund: 17-vjeçari Sätpaev përfitoi nga një gabim i portierit Kotarski dhe shënoi në portë bosh, ndërsa Baybek realizoi në minutën e 90-të për 3-2.

Megjithatë, Copenhagen rezistoi dhe mori fitoren e parë në këtë fazë të Champions League.

Ndërkohë ndeshja mes Pafos-it dhe Monaco-s u mbyll në barazim 2-2. Minamino zhbllokoi fillimisht rezultatin në favor të miqve, por barazoi David Luiz. Balogun shënoi të dytin për Monaco-n po në pjesën e parë, ndërsa  autogolii Salisu vulosi rezultatin përfundimtar.