Britania e Madhe shtyn Francën të ndërhyjë ndaj anijeve të vogla në La Mansh

Franca ka rënë dakord të fillojë ndalimin e anijeve të vogla në Kanalin La Mansh, pas muajsh presioni nga Britania e Madhe.

Sipas BBC, ky ndryshim vjen pasi kryeministri britanik Keir Starmer i shkroi presidentit Emmanuel Macron, duke thënë se aktualisht “nuk kemi asnjë mjet efektiv pengues” në La Mansh, raporton KosovaPress.

Forcat franceze do të mund të ndalojnë anijet vetëm para se të marrin pasagjerët, pasi ndërhyrjet e mëparshme konsideroheshin shumë të rrezikshme. Zëdhënësi i policisë detare franceze tha se qëllimi është të ruhen jetët e njerëzve, por u përjashtua përdorimi i rrjetave për të bllokuar helikat e anijeve.

Vendimi është një hap i rëndësishëm pas një qasjeje më agresive këtë verë, të nxitur nga ish-ministri Bruno Retailleau, i cili kishte kërkuar që ndërhyrjet të fillonin, por kishte pranuar se ishte një çështje e vështirë për shkak të rregullave të policisë detare.

Autoritetet franceze do të lejohen të ndalojnë përsëri anijet para se të marrin migrantët nga plazhet e veriut të Francës, megjithëse ende nuk është e qartë si do të bëhet kjo. Era e fuqishme po vonon fillimin e ndërhyrjeve dhe bandat e trafikimit të njerëzve pritet të ndryshojnë taktikat.

Një zëdhënës i qeverisë britanike tha se Britania dhe Franca po punojnë ngushtë për të adresuar sfidën e migracionit të paligjshëm dhe po rishikojnë taktikat detare për ndërhyrje në ujërat e cekëta.