Genoa zhbllokohet në shtëpi, Udinese mposht Parmën në ‘Tardini’

Genoa më në fund i jep fund ecurisë negative në “Marassi”, duke marrë një fitore shumë të rëndësishme pas nëntë ndeshjesh pa sukses në shtëpi dhe plot 239 ditësh pritje.

Me Daniele De Rossin në pankinë, vendësit kaluan një pasdite me emocione të forta, pasi u gjendën në disavantazh pas golit të Belghali-t në minutën e 21-të.

Megjithatë, reagimi ishte perfekt.

Colombo barazoi rezultatin në minutën e 40-të, ndërsa Thorsby përmbysi gjithçka në minutën e 62-të, duke i dhënë Genoas fitoren 2-1 dhe një frymëmarrje të madhe në luftën për mbijetesë, pasi ekipi ngjitet përkohësisht +1 mbi zonën e kuqe.

Nga ana tjetër, kriza e Veronës vazhdon dhe situata nuk është aspak më e mirë për Parma-n, e cila nuk arrin të marrë pikë as në “Tardini”.

Udinese e Runjaic u tregua cinike dhe efikase, duke fituar 2-0 me golat e Zaniolos në minutën e 11-të dhe Davis në të 65-ën.

Një fitore e pastër që i jep friulianëve moral dhe stabilitet në renditje, ndërsa Parma zhytet edhe më shumë në vështirësi.