Presidenti Finlandës paralajmëron: Paqja e drejtë për Ukrainën është e pamundur

Çdo marrëveshje për të ndaluar luftimet në Ukrainë nuk ka gjasa të përmbushë të gjitha kushtet për një paqe të drejtë, tha presidenti i Finlandës, Alexander Stubb.

Stubb tha se vendet evropiane po punojnë për të ruajtur pavarësinë, sovranitetin dhe integritetin territorial të Ukrainës, por shtoi se “realiteti është se paqja mund të jetë ose e mirë, ose e keqe, ose një lloj kompromisi”.

“Realiteti është se edhe ne finlandezët duhet të përgatitemi për momentin kur të arrihet paqja dhe se të gjitha kushtet për një paqe të drejtë për të cilat kemi folur kaq shumë gjatë katër viteve të fundit nuk ka gjasa të përmbushen”, tha ai.

Ai pranoi gjithashtu se plani prej 28 pikash i SHBA-së i zbuluar muajin e kaluar kishte qenë zhgënjyes për t’u lexuar.

“Bota ka ndryshuar më shumë në katër vitet e fundit sesa në tridhjetë vitet e mëparshme, tha ai duke paralajmëruar se “ne jetojmë në një botë të re kaosi”.

Lidhur me Ukrainën, ai tha se “kur disa sugjerojnë që finlandizimi mund të jetë një zgjidhje për t’i dhënë fund luftës në Ukrainë, unë nuk pajtohem kategorikisht”.

“Një paqe e tillë do të vinte me një kosto shumë të madhe, ajo që në fakt do të ishte dorëzim i sovranitetit dhe territorit”, ka thënë ai.