Reali po e konsideron edhe Alvaro Arbeloan si zëvendësues të Xabi Alonsos

Pas humbjes nga Celta Vigo të dielën, bordi i Real Madridit është alarmuar dhe ka mbajtur një mbledhje emergjente në orët e para të mëngjesit.

Sipas mediumeve spanjolle aty është diskutuar e ardhmja e trajnerit Xabi Alonso, për të cilin thuhet se i kanë dhënë edhe një mundësi, deri te ndeshja me Manchester Cityn në Ligën e Kampionëve.

“Marca” raporton se në rast humbjeje të mërkurën, Xabi Alonso do të shkarkohet, pasi aktualisht skuadra e tij është katër pikë larg Barcelonës në La Liga.

“The Athletic” raporton se Reali ka një listë të ngushtë kandidatësh në rast se vendos të ndahet me Alonson, me Álvaro Arbeloan që vlerësohet shumë për këtë pozitë.

Ish-mbrojtësi i Liverpoolit dhe Real Madridit aktualisht drejton ekipin rezervë, Real Madrid Castilla, që luan në Ligën e Tretë të Spanjës.

Mediumi anglez thekson gjithashtu besimin dhe afeksionin që Florentino Pérez ka për Zinedine Zidane.

Megjithatë, mbetet e paqartë nëse do të bëhej një lëvizje për të.

Javët e fundit, burime pranë 53-vjeçarit kanë folur për dëshirën e tij për të marrë drejtimin e Kombëtares së Francës.

Pérez iu drejtua Zidanes në rrethana të ngjashme në mars të vitit 2019, pas rezultateve të dobëta nën drejtimin e Julen Lopeteguit dhe Santiago Solarit.

Kjo ndodhi pavarësisht largimit të bujshëm të francezit në maj 2018, pasi fitoi trofeun e tretë radhazi të Ligës së Kampionëve.

Në konferencën pas ndeshjes, Alonso u përball me një sërë pyetjesh rreth pozitës së tij.

“Besoj se së bashku e dimë që mund ta kthejmë situatën,” tha ai. “E dimë çfarë do të thonë autokritika dhe standardet e larta në këtë klub; e dimë që humbjet dhembin shumë, por duhet të shikojmë përpara.”

Alonso i dha skuadrës dy ditë pushim pas fitores 3-0 ndaj Athletic Club të mërkurën, një vendim që nuk është pritur mirë. Ky hap është kritikuar në nivele të ndryshme brenda klubit, me arsyetimin se ekipi kishte nevojë për më shumë kohë për t’u përgatitur kundër Celtas.