Ish-bashkëlojtari i Salahut e ‘godet’ ashpër Carragherin

Një ish-bashkëlojtar i sulmuesit të Liverpoolit, Mohamed Salah, e ka quajtur Jamie Carragherin një “turp” në një reagim të ashpër që përfshin Cristiano Ronaldon, Lionel Messin dhe Jose Mourinhon.

Pas ndeshjes mes Leeds dhe Liverpoolit të shtunën, një Salah i irrituar vendosi të shfrynte publikisht zhgënjimin e tij me një deklaratë të pazakontë pas ndeshjes.

Ai tha se ndjen se klubi “e ka hedhur nën autobus” dhe pretendoi se marrëdhënia e tij me trajnerin Arne Slot është prishur pasi u la sërish në stol për të tretën ndeshje radhazi.

Salah, golashënuesi i tretë më i mirë në historinë e Liverpoolit me 250 gola, madje nënkuptoi për largim duke thënë se javën tjetër kundër Brighton do të përshëndeste tifozët para nisjes për Kupën e Kombeve të Afrikës.

Gjatë intervistës, ai përmendi ish-mbrojtësin e Liverpoolit, Jamie Carragher. “Nesër, Carragher do të më kritikojë përsëri, përsëri, përsëri – por është në rregull,” tha Salah me një buzëqeshje.

Dy ditë më vonë parashikimi i tij u realizua. Në “Monday Night Football”, Carragher shpërtheu:

“E mendova si një turp,” tha ai. “Disa e quajnë reagim emocional, por unë nuk mendoj kështu.

Sa herë që Salah ndalet të flasë në mixed zone, gjë që e ka bërë vetëm katër herë në tetë vite, është e organizuar me të dhe agjentin e tij për të shkaktuar sa më shumë dëm dhe për të forcuar pozicionin e tij.”

Carragher madje përmendi periudhën e Salah te Chelsea: “Para se të vinte te Liverpool, Salah njihej si dështimi i Chelseat – kjo është fakt,” tha ai. “Nuk ishe yll para Liverpoolit dhe nuk ke fituar asgjë të rëndësishme me Egjiptin.”

Pas këtyre komenteve, ish-lojtari i Egjiptit dhe shok skuadre i Salah, Ahmed Elmohamady, reagoi ashpër ndaj Carragherit.

Ai shkroi në X: “Jamie, je një turp. Salah e rindërtoi karrierën e tij me punë, përulësi dhe performanca botërore. Ai nuk ‘dështoi’ te Chelsea – nuk iu dha kurrë shansi.

Shkoi në Itali, u rilind, pastaj u kthye në Premier League dhe u bë legjendë e Liverpool-it. Lojtari më i madh në historinë e Egjiptit.”

Elmohamady vazhdoi: “Salah e ka mbajtur Egjiptin për vite me radhë. Na ka çuar dy herë në Kupën e Botës. Ai i ka fituar të gjitha vetë.”

Më pas, ai e sulmoi Carragherin duke përmendur Cristiano Ronaldon, që e injoroi para një ndeshjeje të United në vitin 2022, si dhe Lionel Messin dhe Jose Mourinhon.

“S’është çudi që Ronaldo të injoroi. Jo çudi që Messi të quajti gomar. Jo çudi që Mourinho tha se nuk je as në 1000 mbrojtësit më të mirë në historinë e Premierligës.”

Carragher më parë kishte treguar se Messi e kishte quajtur “gomar” në një mesazh privat në Instagram.

Po ashtu, në vitin 2015, Mourinho e kishte tallur publikisht duke thënë: “Carragher flet shumë për dikë që nuk është as në 1000 mbrojtësit më të mirë në histori. Si mund të flasë për fitimin e Premierligës dikush që s’e ka fituar kurrë atë?”.