Dhjetë tifozë të Rayo Vallecanos përfundojnë në spital

Një episod i rëndë dhune ka tronditur mëngjesin e së enjtes futbollin europian, pasi dhjetë tifozë të Rayo Vallecano u shtruan në spital pas një pritë të organizuar në Poloninë lindore.

Lajmin e kanë konfirmuar autoritetet vendase, të cilat raportojnë se incidenti ka ndodhur mes mbrëmjes së së mërkurës dhe orëve të para të mëngjesit, në një zonë pyjore pranë Ostrow Mazowiecka.

Dy autobusë me mbështetës të ekipit madrilen, të udhëtimit drejt Bialystok për ndeshjen e Conference League kundër Jagiellonia, u bllokuan papritur nga dy makina që iu dolën përpara në rrugë.

Sipas policisë, rreth pesëdhjetë persona, shumë prej tyre me fytyrat e mbuluara me maska, dolën nga pyjet përreth dhe u përplasën me tifozët, duke shkaktuar një përleshje të ashpër.

Reagimi i menjëhershëm i policisë polake parandaloi që ngjarja të merrte përmasa edhe më të rënda.

Në vendngjarje mbërritën ambulanca, të cilat u ofruan ndihmën e parë të plagosurve, ndërsa dhjetë prej tyre u dërguan në spital për ekzaminime të mëtejshme.

Tre tifozë mbeten nën kujdes mjekësor, ndërsa të tjerët janë në gjendje më të qëndrueshme.

Autoritetet polake nuk kanë bërë të ditur ende kombësinë e personave të plagosur, por e kanë cilësuar incidentin si një akt të rëndë agresioni, ndërsa hetimet për identifikimin e autorëve vijojnë me intensitet të lartë.