Befason

Presidenti i Serie A-s, Ezio Maria Simonelli, pas përfundimit të mbledhjes së fundit të Ligës për vitin 2025, bëri të ditur se përveç debatit për ndeshjen Milan-Como të muajit shkurt, e cila mund të zhvillohet edhe në Perth, ka dalë në pah edhe një çështje tjetër me peshë: aleanca e re politike mes tri gjigantëve të futbollit italian.

Milani, i drejtuar nga Massimiliano Allegri, ka propozuar vendosjen e një kufiri për çmimet e biletave në sektorin e tifozëve mysafirë. Sipas Simonellit, iniciativa nuk mori mbështetje të gjerë nga klubet, por u vendos që një komision i posaçëm do të përgatisë një propozim formal që do të hidhet në votim.

Ndër të paktat klube që mbështetën idenë e Milanit ishin Interi dhe Juventusi i Luciano Spallettit, duke krijuar kështu një bosht të qartë mes tri klubeve më historike të vendit. Kjo aleancë tregon edhe një herë ndarjen ideologjike që po zhvillohet në Serie A: klubet e mëdha, me interesa të përbashkëta, kundrejt atyre më të vogla që kundërshtojnë ndryshimet strukturore.

Protestat për çmimet e larta të biletave kanë bërë që këtë sezon, dhe edhe në të kaluarën, sektorët e tifozëve mysafirë të mbeten shpesh të zbrazët, edhe në ndeshje me rëndësi të madhe.

Aleanca e formuar synon të ulë tensionet dhe të gjejë një zgjidhje të qëndrueshme për të rritur praninë e tifozëve nëpër stadiume.

Presidenti Simonelli theksoi se çështja do të trajtohet me prioritet, ndërsa vendimi përfundimtar do të merret në mbledhjen e radhës të Ligës.