A po shkarkohet Amorim nga Manchester United?

E ardhmja e Ruben Amorim te Manchester United nuk është në rrezik, pavarësisht spekulimeve të fundit në rrjetet sociale. Raportime të ndryshme pretenduan se klubi po mendon për një ndryshim trajneri, por burime pranë United i kanë quajtur këto zëra “të pasakta” dhe kanë theksuar se “nuk ka diskutime të brendshme për të ardhmen e Amorimit”.

Sipas informacioneve nga brenda klubit, Amorim po ecën sipas objektivave të vendosura në fillim të sezonit. United është ende në garë për një vend në Ligën e Kampionëve, vetëm dy pikë larg Chelseat në vendin e katërt, ndërsa hierarkia e klubit është “e kënaqur me drejtimin dhe progresin e skuadrës”.

Klubi tashmë po planifikon përforcime në merkato, me synim forcimin e mbrojtjes dhe mesfushës, si dhe afrimin e një lojtari ofensiv anësor. Edhe pse performancat nuk janë perfekte, brenda Old Trafford ekziston bindja se skuadra po bëhet më kohezive dhe më argëtuese.

Vetëm një rënie e fortë e formës do ta vinte Amorimin nën presion, por për momentin ai pritet ta përfundojë sezonin në krye të Manchester United.