Ardon Jashari te Milani: Edhe i dëmtuar, u ndjeva i rëndësishëm

Ardon Jashari këmbëngul se “të gjithë” te Milani e bënë të ndihej i rëndësishëm gjatë periudhës që qëndroi jashtë fushave, teksa vlerëson trajnerin Masimiliano Alegri dhe shokët e skuadrës, Luka Modriç dhe Adrien Rabiot.

Jashari iu bashkua Milanit nga Klub Bryzh verën e kaluar, por pësoi një dëmtim në fibul gjatë stërvitjes, menjëherë pas transferimit në “San Siro”, duke qëndruar më shumë se dy muaj jashtë fushave. 23-vjeçari ka grumbulluar vetëm 121 minuta aktivizim këtë sezon.

“Sinqerisht, pas një vere gjatë së cilës negociatat për ardhjen time te Milani kishin qenë të gjata, të përballesha me një problem të tillë nuk ishte ideale. Kisha punuar me ekipin për tre javë, po rritesha dhe nuk mendoj se dikush në vendin tim do të ishte i lumtur”, u shpreh fillimisht Jashari për “Gazzetta dello Sport”.

Ai më pas vazhdoi të flasë për kuqezinjtë. “Të gjithë te Milani më shkruanin dhe më bënin të ndihesha i rëndësishëm, shokët e skuadrës, stafi, trajneri, drejtuesit. Tre ditët e para ishin të vështira nga ana mendore, por më pas pata mundësinë të kaloja disa javë me familjen time në Zug. Me një kockë të thyer nuk mund të stërvitesha, ndaj kalimi i kohës me prindërit dhe miqtë, pa lënë pas dore fizioterapinë, më ndihmoi shumë. Nuk mendova vazhdimisht për dëmtimin dhe u ndjeva më i qetë. Që nga mesi i shtatorit kam vazhduar terapinë me fizioterapistin David dhe më pas kam nisur stërvitjen, fillimisht në palestër, më pas në rërë dhe në fushë. Rikthimi në grup ishte hapi i fundit”, shpjegoi mesfushori. Jashari iu bashkua kuqezinjve pas javësh negociatash verën e kaluar, duke refuzuar oferta nga klube të tjera për të realizuar transferimin në “San Siro”.

“Kam ëndërruar gjithmonë të jem aty ku jam sot, në një klub të madh. Të gjithë e dinë sa shumë doja t’i bashkohesha Milanit. Klub Bryzh kishte kontakte me disa klube, por unë kisha ide shumë të qarta dhe e shihja veten vetëm me fanellën kuqezi”, tha ai. Trajneri i Milanit, Masimiliano Alegri, ka luajtur si mesfushor gjatë karrierës së tij, në një rol të ngjashëm me atë të Jasharit. “E di që ai ishte një numër 10 dhe pikërisht për këtë mendoj se mund të më ndihmojë shumë. Trajneri është gjithmonë pranë nesh dhe jep besim si individëve, ashtu edhe dhomës së zhveshjes. Ai është thelbësor për suksesin tonë, ka përvojë dhe ka punuar me lojtarë të jashtëzakonshëm. Mund të mësoj shumë prej tij”, shtoi Jashari.

Gjatë verës, Milani ka përforcuar ndjeshëm mesfushën. Përveç Jasharit, janë afruar edhe Samuele Riçi, Adrien Rabiot dhe Luka Modriç. “Të luash me Modriçin është e jashtëzakonshme për këdo, jo vetëm për mua. Luajmë në të njëjtin pozicion dhe mund të mësoj shumë prej tij. Ai ka cilësi teknike të jashtëzakonshme, por edhe një personalitet fantastik, gjë që shihet në mënyrën si sillet me shokët e skuadrës. Rabiot ka pasur një ndikim të madh që nga dita e parë dhe është shumë i rëndësishëm për Milanin. Nuk mund t’i imitosh, sepse secili ka karakteristikat e veta, por gjithmonë mund të mësosh nga kampionë si Modriçi dhe Rabiot për t’u bërë një lojtar më i kompletuar”, përfundoi Jashari.