Dinamo kërkon rikthimin

Dinamo do të luajë sot në orën 16:30 ndeshjen e javës së 17 të Superiores, ku përballë do të ketë Vorën, një rival aspak komod për paraqitjet që ka bërë këtë sezon. Humbja e fundit ndaj Egnatias në shtëpi, ka sjellë sërish shqetësime në kampin blu, duke qenë se u duk se kishte kaluar momenti i vështirë pas fitoreve me Tiranën e Flamurtarin.

Vendi i parë tashmë është 6 pikë larg dhe te Dinamo janë të qartë se çdo pikë e lënë rrugës, mund të kushtojë shumë deri në fund të kampionatit. nga ana tjetër, Vora po e ndjen zonën e ftohtë duke qenë se diferenca e pikëve ëstë shumë e ngushtë dhe ndaj Dinamos, mund ta ketë edhe si një sfidë personale për revansh pas humbjes 0-2 në fazën e parë.

Trajneri Bellai ka treguar këtë sezon se me skuadrën e tij di t’iu marrë pikë skuadrave të mëdha. Këtë e bëri pak ditë më parë në Shkodër kundër Vllaznisë dhe natyrisht që mund ta synojë edhe në sfidën e sotme ndaj Dinamos në stadiumin “Air Albania”, fushë kjo që iu lejon të shprehen mirë të dyja skuadrave dhe të japin maksimumin e tyre.

GJENDJA E SKUADRËS- Veç humbjes me rezultatin 1- 2, Egnatia i solli edhe pasoja Dinamos pasi humbi shërbimet e Klevi Qefalisë që ka plotësuar numrin e kartonëve. Një tjetër mungesë e rëndësishme për Dinamon, është ajo e Gudiabit i cili ka ndjerë shqetësime në ditët e fundit dhe nuk do të jetë i gatshëm për sfidën e sotme ndaj Vorës. Pjesa tjetër e skuadrës ka qenë e plotë dhe natyrisht Daja pret janarit për të pasur edhe Alijin në skuadër si edhe për të pasur mundësinë e merkatos, pasi shpesh herë ka kërkuar sulmues.

NDESHJA E PARË- Dinamo arriti të merrte fitore në sfidën e parë ndaj Vorës të luajtur në stadiumin “Arena e Demave”.

Në fakt, vorakët kishin kërkuar të luanin në fushën e Dinamos por këta të fundit refuzuan dhe në fund arritën të triumfonin me rezultatin 0-2, ku natyrisht nuk munguan edhe polemikat për gjykimin dhe një penallti të pa dhënë për skuadrën e Vorës.

ORARI- Ndryshe nga ndeshjet e shkuara në “Air Albania”, Dinamo do të luajë në orën 16:30. Dy ndeshjet e fundit në Tiranë, Dinamo i ka zhvilluar në orën 19:00 dhe 19:30, teksa me orarin e ri ndoshta mund të ketë edhe një numër më të ulët tifozësh. Duke qenë se ndeshja luhet në ditë javë dhe në orar pune, tifozët në shkallët e stadiumit mund të jenë në numër më të reduktuar, ku për hir të së vërtetës, këtë sezon Dinamo ka qenë ndër skuadrat me më pak tifozë në Superiore.