Priti katër penallti me frakturë në dorë, ja sa do të mungojë

PSG-ja triumfoi ndaj Flamengos në finalen e Kupës Interkontinentale, e zhvilluar në Doha, pas gjuajtjeve të penalltive, falë një performance heroike të portierit Matvey Safonov, i cili arriti të priste katër nga pesë penalltitë, pavarësisht se kishte pësuar një frakturë në dorë.

Që nga transferimi te PSG-ja, Safonov ka qëndruar në hije, fillimisht pas Donnarummës dhe më pas Chevalier-it. Megjithatë, në muajin dhjetor, ai përfitoi nga dëmtimi i portierit francez dhe fitoi vendin e titullarit.

Para finales së Kupës Interkontinentale, Safonov kishte regjistruar dy fitore në Ligue 1, kundër Rennes (5-0) dhe Metz (3-2), si dhe një barazim në Ligën e Kampionëve ndaj Athletic Bilbao-s (0-0).

Duke parë formën e tij të mirë, trajneri Luis Enrique vendosi ta konfirmonte rusin në formacionin titullar, edhe pse Chevalier ishte rikuperuar në kohë për ndeshjen kundër Flamengos. Vendimi rezultoi vendimtar: ish-portieri i Krasnodarit ishte protagonist absolut në Doha, duke u shndërruar në heronjtë e finales dhe duke i dhënë PSG-së trofeun e parë ndërkontinental në histori.

Megjithatë, vetëm dy ditë pas finales, klubi parizien njoftoi se Safonov ishte dëmtuar gjatë ndeshjes dhe do të mungojë për të paktën një muaj. Portieri rus ka pësuar një frakturë në dorën e majtë, por pavarësisht këtij dëmtimi, ai arriti të priste katër penallti, një arritje që ka bërë jehonë të madhe në botën e futbollit.

Si pasojë, Chevalier do të rikthehet si titullar, ndërsa Safonov do të humbasë ndeshjet ndaj Fontenay (Kupa e Francës), Paris FC (Ligue 1), Marseille (Superkupa) dhe Lille (Ligue 1). Po ashtu, mbetet në dyshim pjesëmarrja e tij në përballjen kundër Sportingut në Alvalade, më 20 janar 2026, në kuadër të Ligës së Kampionëve.

Nga ana tjetër, edhe Kang-In Lee u dëmtua në finale, duke pësuar një dëmtim muskulor në kofshën e majtë. Mesfushori korean do të mungojë për disa javë dhe rrezikon gjithashtu të mos jetë i gatshëm për sfidën në Lisbonë.