Përballja e radhës e Real Madridit ndaj Sevillës

Përballja e radhës e Real Madridit ndaj Sevillës shihet si një provë vendimtare për stolin e trajnerit Xabi Alonso. Pakënaqësia e tifozëve me paraqitjet e fundit ka rritur presionin, duke e kthyer këtë ndeshje në një shans të fundit për teknikun spanjoll.

Real Madrid do ta mbyllë kalendarin e vitit 2025 në Santiago Bernabéu, në përballjen ndaj Sevilla, me objektivin e qartë për të marrë tre pikët dhe për të qetësuar zërat kritikë, ndërsa gara për titull mbetet e hapur.

Seria e rezultateve jo bindëse ka rritur presionin mbi skuadrën dhe stafin teknik, duke krijuar një klimë tensioni mes tifozëve. Mbetet për t’u parë se si “Bernabéu” do ta presë ekipin dhe trajnerin Xabi Alonso në këtë sfidë të fundit të vitit.

Nga ana tjetër, Sevilla vjen me shpresën për të përfituar nga kjo trazirë, edhe pse statistikat nuk janë në favorin e saj: andaluzianët nuk kanë fituar në shtëpinë e Real Madridit që prej vitit 2008. Fitoret e fundit kundër Alavés dhe Talavera i kanë dhënë pikë, por jo qetësi, pasi paraqitjet kanë lënë ende dyshime.

Xabi Alonso ka hedhur poshtë aludimet për largim, duke theksuar mbështetjen e klubit dhe besimin te projekti: “Kërkesa është maksimale. Është një rrugë e gjatë, me ulje-ngritje. Duam ta mbyllim vitin mirë dhe ta fillojmë tjetrin me vendosmëri,” u shpreh ai për mediat madrilene.

Sa i përket formacionit, mungesat mbeten të njëjta, me Federico Valverde në dyshim për ndeshjen e së shtunës. Pas Sevillës, Real Madridi do ta nisë 2026-ën kundër Real Betis në La Liga, përpara gjysmëfinales së Superkupës së Spanjës në derbin ndaj Atlético Madrid.