Do të luajë ende futboll edhe në moshën 59-vjeçare

Karriera e një futbollisti profesionist zakonisht është e shkurtër dhe e kufizuar nga koha, por ka raste që arrijnë të sfidojnë çdo rregull të pashkruar.

Një prej tyre është pa dyshim Kazu Miura, legjenda e futbollit japonez dhe simbol i vërtetë i jetëgjatësisë sportive, i cili vazhdon të luajë edhe pse mosha për shumicën e lojtarëve mbetet vetëm një kujtim i largët.

Sulmuesi japonez, i cili vjen pas përvojave të fundit në Portugali me Oliveirense-n në sezonet 2022/23 dhe 2023/24, do të festojë më 26 shkurt ditëlindjen e tij të 59-të.

Megjithatë, në vend që të mendojë për pensionimin dhe t’i varë këpucët në gozhdë, Miura ka zgjedhur të vazhdojë rrugëtimin e tij në futbollin aktiv, duke firmosur një kontratë të re me Fukushima United, skuadër që militon në divizionin e tretë të kampionatit japonez.

Ky vendim e konfirmon edhe një herë mentalitetin dhe pasionin e jashtëzakonshëm të “King Kazu”, i cili për dekada me radhë ka qenë një pikë referimi jo vetëm për futbollin japonez, por edhe për sportin në përgjithësi.

Çdo sezon i ri për të shndërrohet në një ngjarje historike, një dëshmi se dashuria për lojën mund të mposhtë kufijtë biologjikë.