Thiago Silva nuk e bindi Milanin

Thiago Silva është zyrtarisht lojtar i Portos, por para se të konkretizohej rikthimi i tij në Evropë, në prapaskenë kishte ekzistuar një tentativë reale për ta transferuar mbrojtësin brazilian te Milani.

Megjithatë, sipas asaj që del nga prapaskenat e fundit, nuk ishte klubi kuqezi në tërësi që e shtyu këtë ide, por pothuajse ekskluzivisht Zlatan Ibrahimoviç.

Ibrahimoviçi, në rolin e këshilltarit të Gerry Cardinale-s, e kishte vlerësuar shumë profilin e Thiago Silvës: eksperiencë e jashtëzakonshme, personalitet, lidership dhe njohje e ambientit milanist. Në moshën 41-vjeçare, ish-kapiteni i Brazilit shihej nga suedezi si një përforcim me peshë, sidomos për dhomën e zhveshjes. Por presioni i Ibrahimoviçit nuk mjaftoi.

Drejtuesit e Milanit, me Giorgio Furlanin në krye, thanë “jo” ndaj kësaj ideje, duke mos u bindur nga një operacion që konsiderohej më shumë emocional sesa strategjik.

Po ashtu, ndryshe nga zërat e parë, as trajneri Massimiliano Allegri nuk dha dritën jeshile për transferimin e qendërmbrojtësit veteran, duke preferuar profile të tjera për projektin teknik.

Ndërkohë, vetë Thiago Silva ka shpjeguar publikisht arsyet që e çuan drejt Portos. Vendimi për t’u larguar nga Fluminense nuk ishte i lehtë dhe ka shkaktuar reagime të forta në Brazil. Përmes rrjeteve sociale, mbrojtësi ka theksuar dashurinë e tij për klubin dhe mirënjohjen ndaj presidentit, por ka sqaruar se zgjedhja për t’u kthyer në Evropë lidhet kryesisht me familjen. “Dua të jem më afër fëmijëve të mi, kam humbur shumë momente të veçanta”, ka shkruar ai.

Një vendim njerëzor, i marrë në fund të një karriere madhështore, ndërsa për Milanin mbetet vetëm një ide e parealizuar, e shtyrë thuajse e vetme nga Zlatan Ibrahimoviçi.