Slot vlerëson etikën e punës së Ekitike

Trajneri i Liverpool, Arne Slot, ka vlerësuar transformimin e Hugo Ekitike nga sulmues rezervë në një golashënues vendimtar. 

Skuadra Kampione në fuqi ka kaluar një periudhë shumë të vështirë, duke pësuar nëntë humbje në dymbëdhjetë ndeshje në të gjitha garat, por tashmë është ngjitur në vendin e pestë, me Ekitike si figurë kryesore të këtij rikthimi. Njëzet e tre vjeçari ka shënuar tetë gola në kampionat, pesë prej tyre në tri ndeshjet e fundit.

Ardhja e Ekitike gjatë verës ishte lënë në hije nga transferimi rekord i Alexander Isak. Megjithatë, me sulmuesin suedez jashtë fushës për dy muaj për shkak të një lëndimi dhe me Mohamed Salah të angazhuar në Kupën e Afrikës, Ekitike është shndërruar në një lojtar të pazëvendësueshëm.

“Ai ka treguar shumë punë të madhe për të arritur këtë nivel të formës fizike ku ndodhet tani,” ka thënë Slot para ndeshjes së së shtunës në shtëpi ndaj Wolves. “Ndonjëherë më është dashur pak bindje që të kuptoja se e gjithë kjo është e nevojshme për t’u bërë më i fortë, por ai gjithmonë e ka bërë. Jo gjithmonë me buzëqeshje, por ka punuar shumë fort për t’u përgatitur më mirë, brenda dhe jashtë fushës”.

Gjithashtu Slot ka zbuluar se i është dashur shumë bindje që Ekitike të përfshihej më shumë në detyrat mbrojtëse, sidomos në situatat e goditjeve standarde.

“Jam përpjekur ta bind se sa më mirë të mbrohesh në goditjet standarde, aq më e madhe është mundësia për të shënuar në anën tjetër. Nëse rezultati është 0-0, është më lehtë të shënosh sesa kur je në disavantazh 1-0”,a shtuar Slot. “Për ne dhe për të, që të shënojmë gola, është e rëndësishme të mos pranojmë gola nga goditjet standarde”. 

Trajneri i Liverpool ka theksuar se Ekitike është i gatshëm për programin e ngjeshur që e pret ekipin, por ka sqaruar se ai nuk është sulmuesi i vetëm në dispozicion, pasi edhe Federico Chiesa mund të luajë në atë pozicion.