Juventusi kthen yllin e madh në Serie A?

Juventusi është i interesuar të sjellë Sandro Tonali dhe ndërkombëtari italian thuhet se është i hapur për një rikthim në Serie A.

Mesfushori 25-vjeçar i Newcastle ka qenë një objektiv për gjigantët e Torinos për një kohë të gjatë, të cilët e shohin si një zgjidhje ideale për mesfushën e tyre.

Edhe pse ai u transferua nga Milan në Angli, burime pranë lojtarit thonë se Tonali nuk është ndarë emocionalisht nga futbolli italian.

Gazzetta dello Sport thekson se mesfushori është i hapur për një transferim dhe do të ishte i lumtur të merrte në konsideratë një rikthim në Apenine në afatin e ardhshëm të transferimeve, transmeton KosovaPress.

Megjithatë, realizimi i këtij transferimi nuk do të jetë aspak i lehtë. Newcastle e sheh Tonalin si një pjesë të rëndësishme të projektit të tyre afatgjatë dhe nuk planifikon ta heqë lehtë. Pritet që klubi anglez të kërkojë një kompensim të lartë, që do të thotë se Juventusi do të duhet të planifikojë me kujdes anën financiaret.

Për të ulur shumën e kompensimit, ekziston mundësia që Juventusi të përfshijë disa nga lojtarët e tij në negociata si pjesë e shkëmbimit. Tonali ka një vlerë tregu prej 75 milionë eurosh sipas Transfermarkt. Mediat italiane po theksojnë se muajt në vijim mund të jenë vendimtarë për rezultatin e kësaj historie.