Manchester City pranë blerjes së sulmuesit

Manchester City është shumë pranë përforcimit që shumë tifozë dhe ekspertë prisnin: Antoine Semenyo, sulmues 25-vjeçar i Bournemouth-it.

Sipas Sky Sports, ‘qytetarët’ janë gati të paguajnë vlerën e klauzolës së tij të largimit, që arrin 75 milionë euro, për ta siguruar lojtarin këtë muaj janar.

Semenyo është ndër objektivat kryesorë të merkatos së dimrit, me një klauzolë largimi prej 65 milionë paundë (75 milionë euro).

Lojtari ka të drejtën të përfaqësojë Ganën, por ka lindur në Londër.

Ai ka tërhequr interesin e klubeve të mëdha si Liverpool, Chelsea, Tottenham dhe Manchester United, por City është i vetmi që ka avancuar me negociata konkrete me Bournemouth-in dhe marrëveshja është shumë pranë përfundimit.

City po tenton të negociojë edhe mënyrën e pagesës, ndërsa klauzola është e vlefshme vetëm midis 1 dhe 10 janarit, sipas Sky Sports.

Semenyo ka pasur një sezon të shkëlqyer me Bournemouth-in: në 18 ndeshje Premier League ka shënuar 9 gola dhe ka dhënë 3 asistime, duke luajtur gjithsej 1,844 minuta.

Ai luajti të gjithë 90 minutat në barazimin e fundit të Bournemouth-in në Londër ndaj Chelsea-t dhe trajneri Andoni Iraola e konsideroi lojtar shumë të rëndësishëm për skuadrën: "Ai është një lojtar thelbësor për ne dhe kjo nuk ishte fare ndeshja e tij e fundit", tha Iraola.

Nëse transferimi përfundon, Semenyo do të shtohet në një skuadër si City me shumë sulmues të klasit të lartë, duke rritur më tej fuqinë e ofensivës së Pep Guardiolës në Premier League dhe në Champions League.