Ish-ndihmësi i tij u largua pas skandalit të korrupsionit, Zelensky emëron shefin e spiunazhit në krye të zyrës presidenciale

Presidenti i Ukrainës, Volodymyr Zelensky, ka emëruar Kyrylo Budanov, kreun e inteligjencës ushtarake, në postin e shefit të ri të stafit të presidencës, më shumë se një muaj pas largimit të ndihmësit të tij të mëparshëm, i cili dha dorëheqjen në mes të polemikave për korrupsion.

“Në këtë moment, Ukraina ka nevojë për një fokus më të madh në çështjet e sigurisë”, u shpreh Zelensky, duke argumentuar vendimin e tij.

Budanov, 39 vjeç, ka drejtuar deri tani inteligjencën ushtarake HUR, e cila është vlerësuar për disa operacione dhe sulme të suksesshme kundër forcave ruse që prej nisjes së luftës.

Paraardhësi i tij, Andriy Yermak, kishte një rol me ndikim të madh politik gjatë pushtimit në shkallë të plotë të Ukrainës nga Rusia, që nisi në vitin 2022. Ai udhëhoqi gjithashtu ekipin negociator ukrainas në bisedimet kyçe me Shtetet e Bashkuara, të fokusuara në përpjekjet për t’i dhënë fund konfliktit.

Zelensky theksoi se vendi ndodhet në një fazë ku kërkohet përqendrim i shtuar në sigurinë kombëtare, zhvillimin e forcave të mbrojtjes dhe avancimin e rrugës diplomatike të negociatave, duke shtuar se Budanov ka përvojën dhe aftësitë e nevojshme për të dhënë rezultate konkrete në këto fusha.

Presidenti ukrainas bëri të ditur se i ka kërkuar tashmë shefit të ri të stafit të përditësojë dhe të paraqesë dokumente kyçe që lidhen me themelet strategjike të mbrojtjes së Ukrainës.

Ndërkohë, Andriy Yermak, 54 vjeç, dha dorëheqjen më 28 nëntor, një zhvillim që u konsiderua si një goditje e rëndësishme për Zelenskyn. Largimi i tij erdhi menjëherë pas bastisjes së banesës së tij në Kiev nga agjencitë antikorrupsion të vendit.