Finlanda publikon një video të sekuestrimit të anijes ruse

Rojet kufitare finlandeze kanë publikuar pamjet e një operacioni në të cilin kanë sekuestruar një anije mallrash të dyshuar për dëmtimin e një kablloje telekomunikacioni që lidh Helsinkin dhe Talinin në Gjirin e Finlandës.

Një anije e sekuestruar në Finlandë këtë javë me dyshimin për dëmtimin e një kablloje telekomunikacioni nënujor po transportonte çelik rus nën sanksionet e Bashkimit Evropian, kanë konfirmuar autoritetet finlandeze.

Incidenti ndodhi në një kohë tensionesh të larta në rajonin e Detit Baltik, ku vendet janë në gatishmëri të lartë për shkak të një sërë dëmtimesh në infrastrukturën kyçe nënujore, shkruan Euronews .

Të mërkurën, policia finlandeze ndaloi anijen mallrash Fitburg, 132 metra të gjatë, e cila po lundronte nga porti i Shën Petersburgut drejt portit izraelit të Haifës.

Të 14 anëtarët e ekuipazhit u arrestuan me dyshimin se spiranca e anijes dëmtoi një kabllo telekomunikacioni në Gjirin e Finlandës.

Duke inspektuar ngarkesën, dogana finlandeze zbuloi gjithashtu një shkelje të mundshme të sanksioneve.

"Informacionet paraprake tregojnë se ngarkesa përbëhej nga produkte çeliku me origjinë nga Rusia, të cilat i nënshtrohen sanksioneve të gjera të vendosura ndaj Rusisë", thanë doganat finlandeze në një deklaratë.

Ekspertët kanë vlerësuar se çeliku strukturor i gjetur në anije bie nën sanksionet sektoriale të BE-së, importi i të cilit është i ndaluar.

"Importi i mallrave të tilla të sanksionuara në BE është i ndaluar nga rregulloret e BE-së mbi sanksionet", theksojnë doganat.

Ngarkesa u sekuestrua deri në njoftim të mëtejshëm dhe u nis një hetim paraprak për një shkelje të mundshme të sanksioneve.

Policia po e heton incidentin si një krim të rëndë.

Anija Fitburg lundron nën flamurin e Shën Vincentit dhe Grenadineve, dhe ekuipazhi përbëhej nga shtetas të Rusisë, Gjeorgjisë, Azerbajxhanit dhe Kazakistanit.

Dy anëtarë të ekuipazhit u arrestuan të enjten, ndërsa dy të tjerëve iu dha ndalim udhëtimi, por policia nuk zbuloi kombësitë ose rolet e tyre në anije.

Në vitet e fundit, infrastruktura e energjisë dhe e komunikimit në vendet baltike, duke përfshirë kabllot nënujore dhe tubacionet e gazit, ka qenë shpesh cak i dëmeve.

Shumë ekspertë dhe politikanë besojnë se sabotimi i dyshuar është pjesë e një "lufte hibride" që Rusia po zhvillon kundër vendeve perëndimore pas pushtimit të Ukrainës në shkurt të vitit 2022.