Sllovenia në zgjedhje parlamentare më 22 mars

Presidentja e Sllovenisë, Natasa Pirc Musar caktoi sot datën 22 mars për mbajtjen e zgjedhjeve parlamentare në vendin anëtar të Bashkimit Evropian, sipas AP.

“Dua që zgjedhjet të zhvillohen në mënyrë të drejtë dhe do t’i kushtoj vëmendje dezinformimit dhe manipulimit, përfshirë edhe atij që vjen nga jashtë”, deklaroi Musar.

Votimi për Kuvendin me 90 anëtarë shihet si një test për qeverinë liberale, e cila përballet me një sfidë nga partitë populiste të krahut të djathtë.

Shteti alpin me rreth 2 milionë banorë u shkëput nga ish-Jugosllavia komuniste në vitin 1991 dhe iu bashkua NATO-s dhe BE-së në vitin 2004.

Qeveria e koalicionit e kryeministrit Robert Golob erdhi në pushtet në vitin 2022, pasi mposhti paraardhësin e tij populist, Janez Jansa, i cili akuzohej se po e shtynte vendin tradicionalisht të moderuar drejt së djathtës.

Nën drejtimin e Golobit, Sllovenia njohu shtetin e Palestinës, ndërsa opozita e akuzon atë për ngadalësimin e ekonomisë.