Ballkani goditet nga moti ekstrem

Moti i ashpër përfshiu pjesë të mëdha të Ballkanit këtë javë, ndërsa erërat e fuqishme, shirat e rrëmbyeshëm, përmbytjet dhe reshjet e dendura të dëborës shkaktuan ndërprerje të transportit, furnizimit me energji elektrike në të gjithë rajonin.

Në Turqinë perëndimore, një stuhi e fortë që solli erëra me forcë uragani dhe shira të rrëmbyeshëm shkaktoi përmbytje dhe detyroi pezullimin e trafikut detar përmes Bosforit dhe Dardaneleve.

Në Stamboll, shpejtësia e erës tejkaloi 70 kilometra/orë në disa zona, duke çuar në anulimin e shërbimeve të trageteve.

Pemët që ranë shkaktuan dëme materiale dhe plagosën të paktën një këmbësor.

Në Rumani, reshjet e borës dhe temperaturat e ulëta lanë më shumë se 11 000 familje pa energji elektrike në disa qarqe.

Shërbimet e emergjencës kryen mijëra ndërhyrje, kryesisht në zonat e mbuluara nga bora dhe të vështira për t’u aksesuar.

Shumë shkolla kaluan në mësim online ose pezulluan mësimet tërësisht.

U parashikua një valë e fortë të ftohtit, me temperatura deri në minus 15 gradë Celsius.

Shërbimet hekurudhore u prekën gjithashtu, me vonesa të konsiderueshme të raportuara të trenave.

Në Greqi, erërat e forta bllokuan trafikun e trageteve, duke lënë qindra pasagjerë të bllokuar në porte.

Deti i trazuar, që arriti forcën 8 deri në 9 ballë, ndërpreu lidhjet detare nga Pireu, Rafina dhe Lavrio në shumicën e ishujve.

Autoritetet u bënë thirrje udhëtarëve të qëndronin të informuar, duke paralajmëruar se kufizimet do të mbeteshin në fuqi derisa të përmirësoheshin kushtet.

Serbia shënon ditën e dytë të mbuluar me borë dhe akull, me ndërprerje të transportit publik dhe masa emergjente në disa pjesë të vendit.

Kushtet mbeten veçanërisht të vështira në Beograd dhe rajone malore.

Në kryeqytet, trafiku u prek më rëndë, shërbimet e transportit u pezulluan dhe disa linja autobusësh u ridrejtuan.

Të paktën 20 persona u evakuuan nga zonat në rrezik në të gjithë vendin.

Zyrtarët thanë se situata ishte nën kontroll, por paralajmëruan për ngrica të mëtejshme gjatë natës, me temperatura deri në minus 14 gradë Celsius.

Në Slloveni, autoritetet lëshuan një alarm portokalli për mot të ftohtë ekstrem, me temperatura që pritet të bien në minus 20 gradë Celsius.

Kushtet e rrugëve mbetën të rrezikshme pas reshjeve të mëparshme të borës dhe ngricave të mëvonshme, ndërsa zyrtarët e shëndetësisë paralajmëruan për rreziqe në rritje për grupet e cenueshme.

Në Bosnjë-Hercegovinë, kushtet ishin relativisht të qeta, megjithëse autoritetet paralajmëruan se kishte ende rreziqe.

Ndërsa reshjet e borës në Sarajevë kanë ndaluar, bora e akumuluar dhe temperaturat e ulëta vazhdojnë të shkaktojnë vështirësi, veçanërisht në zonat kodrinore dhe të vështira për t’u aksesuar.

Rrugët kryesore dhe transporti publik po funksionojnë normalisht, por pastrimi i borës në rrugët dytësore ka mbetur prapa për shkak të mungesës së pajisjeve dhe personelit.

Autoritetet lokale i nxitën banorët të qëndronin vigjilentë, duke vënë në dukje se shkrirja e borës mund të sillte rreziqe shtesë.

Në Mal të Zi, reshjet e dendura të shiut dhe lumenjtë që dalin nga shtrati vazhduan të prishin trafikun dhe të shkaktojnë përmbytje në disa komuna, megjithëse situata po stabilizohet gradualisht në shumë zona.

Disa rrugë kryesore mbeten të mbyllura për shkak të rrëshqitjeve të dheut dhe niveleve të larta të ujit.

Evakuimet janë kryer në vende të caktuara, ndërsa ushtria dhe shërbimet e emergjencës punojnë për të ndërtuar infrastrukturë të përkohshme dhe për të përmirësuar kullimin.

Në Maqedoninë e Veriut, shirat e rrëmbyeshëm çuan në dalje të lumenjve, përmbytje dhe rrëshqitje të dheut.

Banorët u evakuuan në Kërçovë, ndërsa përmbytje u raportuan në zonat përreth lumit Vardar, Ohrit, Resnjës dhe Gostivarit.

Rrëshqitjet e dheut penguan trafikun në disa rrugë, ndërsa situata më kritike mbetet në pellgun e lumit Vardar dhe degët e tij.

Përmbytjet në qytetin e Mitrovicës detyruan evakuimin e 15 familjeve nga një lagje e vetme.

Komandanti i zjarrfikësve, Burim Ibishi tha se pothuajse e gjithë zona ishte përmbytur, me ekipet e emergjencës që po punonin për evakuimet dhe kontrollin e dëmeve.

Shërbimet meteorologjike në të gjithë Ballkanin i kanë kërkuar publikut të qëndrojë vigjilent dhe të ndjekë udhëzimet zyrtare, duke paralajmëruar se moti i paqëndrueshëm pritet të vazhdojë në ditët në vijim.