Probleme me qindra tifozë

Një situatë e pakëndshme u regjistrua këtë pasdite para nisjes së ndeshjes mes AF Elbasanit dhe Egnatias, ku rreth 400 tifozë verdheblu mbetën jashtë stadiumit “Arena Egnatia”, pavarësisht se kishin udhëtuar për të mbështetur ekipin e tyre.

Sipas burimeve në terren, tifozët e Elbasanit nuk u lejuan të hynin në stadium për shkak të kufizimeve organizative dhe mungesës së një sektori të përcaktuar për ta, duke shkaktuar pakënaqësi dhe tension në ambientet përreth impiantit sportiv.

Shumë prej tyre kishin mbërritur herët dhe prisnin të ndiqnin nga afër një ndeshje me rëndësi për verdheblutë.

Ngjarja ka shkaktuar reagime të shumta edhe në rrjetet sociale, ku tifozët kanë shprehur indinjatën e tyre për trajtimin e marrë dhe për mungesën e koordinimit mes organizatorëve të ndeshjes dhe strukturave përkatëse.

Deri më tani nuk ka një reagim zyrtar nga klubi i Egnatias apo nga institucionet përgjegjëse për mbarëvajtjen e ndeshjes, ndërsa pritet që situata të sqarohet në orët në vijim.

Tifozët e AF Elbasanit kërkojnë shpjegime dhe respekt për mbështetjen e tyre të vazhdueshme ndaj skuadrës.