Klubet saudite synojnë Mohamed Salah dhe Vinicius Junior

Saudi Pro League po përgatitet për një ofensivë të madhe në merkaton e verës, me Mohamed Salah dhe Vinicius Junior si objektivat kryesorë të klubeve saudite.

Sipas raportimeve, disa klube kanë shqyrtuar mundësinë e transferimit të Salah që në këtë merkato dimri, por Liverpooli nuk ka treguar gatishmëri për negociata.

Sulmuesi egjiptian, tashmë 33 vjeç, ende nuk ka vendosur nëse është gati të lërë elitën e futbollit evropian në fund të sezonit.

Interesi i Saudi pritet të rritet ndjeshëm gjatë verës, kur klubet do të kenë më shumë fleksibilitet për të bërë blerje të mëdha, pas përfundimit të disa kontratave të profilit të lartë. Situata e Vinicius Junior gjithashtu monitorohet nga afër, pasi negociatat për rinovimin e kontratës me Real Madrid janë bllokuar dhe kontrata aktuale skadon në 2027.

Ndërsa disa brenda ligës e shohin Salah si një ikonë globale që mund të rrisë profilin e futbollit saudit, të tjerë besojnë se Vinicius përfaqëson një investim më strategjik dhe afatgjatë.

Ky zhvillim sinjalizon se Saudi Pro League është gati të vijë sërish në qendër të vëmendjes me blerje spektakolare, duke u përpjekur të tërheqë disa nga ‘yjet’ më të mëdhenj të futbollit botëror.