Barcelona ka bërë një hap të rëndësishëm

Barcelona ka bërë një hap të rëndësishëm drejt rikthimit në qendër të vëmendjes europiane, duke paraqitur zyrtarisht kandidaturën për të pritur finalen e Champions League 2029 në stadiumin e saj legjendar, “Spotify Camp Nou”.

Klubi blaugrana, i cili u rikthye sezonin e kaluar të luajë në impiantin e tij  synon që punimet të përfundojnë plotësisht deri në fund të vitit 2027, duke e shndërruar “Camp Nou” në një nga stadiumet më modernë në botë. Pikërisht kjo e bën atë jo vetëm kandidat serioz për finalen e Champions 2029, por edhe një emër të fortë për të pritur finalen e Botërorit 2030.

Në një njoftim zyrtar, Barcelona konfirmoi se kandidatura është ndërtuar në bashkëpunim të ngushtë me Bashkinë e Barcelonës dhe Qeverinë e Katalonjës, me synimin që eventi të zhvillohet në kryeqytetin katalanas. Procesi ka marrë gjithashtu mbështetjen e Federatës Spanjolle të Futbollit (RFEF), duke i dhënë aplikimit peshë më të madhe institucionale.

Sipas klubit, kandidatura ndodhet aktualisht në një fazë paraprake vlerësimi, ku do të shqyrtohen aspektet teknike dhe organizative për të bindur UEFA-n mbi përshtatshmërinë e stadiumit dhe qytetit, në përputhje me standardet ndërkombëtare.

Vlerësimi fillestar pritet të pasohet nga dorëzimi i dosjes përfundimtare në fillim të qershorit 2026, moment kyç që do të përcaktojë edhe shanset reale të Barcelonës për të sjellë finalen e madhe europiane në “tempullin” e saj të rinovuar.