Moment i pazakontë në Kupën e Mbretit, reagimi i gjyqtarit habit tifozët e Barcelonës

Ndeshja e Kupës së Mbretit mes Albacetes dhe Barcelonës, e fituar nga katalanasit, ka nxitur polemika të shumta në rrjetet sociale, ku në qendër të kritikave është vënë gjyqtari José Luis Munuera Montero. Edhe pse Barcelona arriti kualifikimin, një moment në fund të takimit ka shkaktuar zemërim të madh te tifozët blaugrana.

Sipas reagimeve të shumta online, tifozët e Barcelonës kanë vënë në dyshim neutralitetin e arbitrit pas një rasti kur Albacete ishte shumë pranë golit të barazimit.

Në pamjet e shpërndara gjerësisht në rrjetet sociale, Munuera Montero shihet duke ngritur duart në një mënyrë që u interpretua nga tifozët si reagim emocional ndaj aksionit të skuadrës vendase.

Kjo sjellje ka bërë që arbitri të kritikohet ashpër nga mbështetësit e Barcelonës, të cilët e kanë cilësuar veprimin e tij si të papërshtatshëm për një gjyqtar. Megjithatë, disa media sportive spanjolle kanë vlerësuar se arbitrimi i ndeshjes në tërësi nuk ka pasur gabime të rënda vendimtare, duke e konsideruar polemikën më shumë si reagim emocional të tifozëve sesa si problem real të arbitrimit.