Icardi qëndron te Galatasaray

Pas mbylljes së zërave të merkatos, Mauro Icardi është rikthyer protagonist në fushë me fanellën e Galatasaray-t, duke shënuar në fitoren 3-1 ndaj Istanbulsporit në Kupën e Turqisë.

Një gol me peshë të veçantë për sulmuesin argjentinas, pasi me këtë realizim ai është bërë lojtari i huaj me më shumë gola në historinë e klubit, duke lënë pas një legjendë si Gheorghe Hagi.

Icardi ka tani 73 gola në të gjitha kompeticionet me fanellën verdhekuqe, që prej transferimit të tij në Stamboll në verën e vitit 2023. Ai ishte gjithashtu golashënuesi më i mirë i Superligës turke në sezonin 2023/24, duke u kthyer shpejt në një nga figurat më të dashura për tifozët e Galatasaray-t.

Kontrata e Icardit me klubin turk është drejt përfundimit, çka pritet ta bëjë atë një nga emrat më të kërkuar në afatin e ardhshëm të transferimeve. Megjithatë, për momentin argjentinasi vazhdon të lërë gjurmë dhe të shkruajë histori me skuadrën e drejtuar nga Okan Buruk.

Dy golat e tjerë në këtë takim u shënuan nga Lucas Torreira dhe Kutucu, duke vulosur suksesin e Galatasaray-t. Formati i Kupës së Turqisë këtë sezon parashikon një fazë me grupe, ku 24 skuadra janë të ndara në tri grupe nga tetë ekipe.

Pas tri ndeshjesh, Galatasaray kryeson grupin e tij me 9 pikë të plota, duke konfirmuar formën e mirë edhe në këtë kompeticion.