Olimpiada Dimërore: Milano në alarm maksimal sigurie

Alarmi i sigurisë është aktivizuar prej kohësh në Milano, në përgatitje të ceremonisë së hapjes së Lojërave Olimpike Dimërore.

Ngjarjet e fundit në Torino kanë rritur më tej nivelin e gatishmërisë, veçanërisht për të premten, më 6 janar, ditën e ceremonisë solemne të hapjes, dhe për të shtunën, më 7 janar, kur në orën 15:00 do të nisë një marshim proteste nga Piazza Medaglie d’Oro, duke kaluar pranë fshatit olimpik.

Manifestimi, i organizuar nga grupe të ndryshme antagoniste, pritet të bashkojë lëvizje të natyrave të ndryshme. Këtu përfshihen grupet pro-palestineze, të cilat çdo fundjavë marshojnë në rrugët e Milanos, si dhe grupe të ndryshme kundër zhvillimit të Olimpiadës. Ekziston gjithashtu frika se mund të bashkohen militantë nga Torino të grupit Askatasuna, pas përleshjeve të 31 janarit që shkaktuan plagosjen e disa agjentëve të policisë dhe protestuesve.

Dislokimi i forcave të rendit do të jetë i madh, me rreth 6,000 agjentë të shpërndarë mes ushtrisë, karabinierëve dhe policisë lokale, të mbështetur nga 170 mjete dhe kontroll i vazhdueshëm nga ajri me helikopterë e dronë. Këto forca do të mbrojnë zonat e kuqe rreth objekteve olimpike, nga fshati olimpik në Porta Romana, stadiumi Meazza, Santa Giulia dhe Fiera di Rho, deri në Piazza Duomo dhe rrugët e qendrës ku do të kalojë flaka olimpike. Udhëtimi i flakës do të kulmojë rreth orës 23:00 të së premtes me ndezjen e pishtarit në Harkun e Paqes.

Dy orë para ceremonisë së hapjes, e cila fillon në orën 20:00, aktivistët e “Komitetit të Olimpiadave të Paqëndrueshme” kanë njoftuar një marshim me pishtarë kundër lojërave, që do të nisë në orën 18:00 nga viale Mar Jonio. Kjo zonë do të jetë e blinduar nga forcat e rendit për ardhjen e delegacioneve.

Në stadiumin Meazza pritet të jenë të pranishëm rreth 50 krerë shtetesh, mes 65,000 spektatorëve që do të marrin pjesë në këtë ngjarje madhore.