Mjeshtëria e Yamalit dhe shkëlqimi i 18-vjeçarit Bernal shkatërrojnë Mallorca-n e Vedat Muriqit

Barcelona ka regjistruar një fitore bindëse në “Camp Nou”, duke mposhtur Mallorca-n me rezultat 3:0, në një ndeshje ku katalanasit dominuan nga minuta e parë deri në fund.

Mallorca nuk arriti të ishte konkurruese. 

Sulmuesi Vedat Muriqi mbeti thuajse i padukshëm në fushë dhe u zëvendësua pas 77 minutash lojë.

Barcelona e hapi rezultatin në minutën e 29-të me golin e Robert Lewandowskit.

Epërsia u dyfishua në minutën e 61-të, kur Lamine Yamal realizoi një gol nga rreth 25 metra, duke e dërguar topin në këndin e poshtëm të majtë të portës.

Shfaqje mbresëlënëse pati edhe 18-vjeçari Marc Bernal, i cili në minutën e 83-të mashtroi mbrojtjen e Mallorca-s dhe shënoi me shumë gjakftohtësi, duke vulosur fitoren përfundimtare të Barcelonës.

Pas kësaj ndeshjeje, Barcelona kryeson renditjen me 58 pikë, ndërsa Mallorca gjendet në pozitën e 15-të me 24 pikë, pas javës së 23-të të kampionatit spanjoll.