Rrëfehet për herë të parë Gisèle Pelicot: Historia që tronditi botën dhe u kthye në simbol

Gisèle Pelicot, gruaja franceze që tronditi opinionin publik me historinë e saj të abuzimit seksual, ka dhënë intervistën e parë televizive pas gjyqit historik kundër ish-bashkëshortit të saj. Në intervistë, Pelikot foli për momentin kur mësoi të vërtetën, për familjen dhe për procesin e saj të shërimit.

Gisèle Pelicot (Zhiselë Pelikot), gruaja franceze që në vitin 2024 u shndërrua në simbol global të luftës kundër dhunës seksuale, ka dhënë intervistën e saj të parë televizive pas gjyqit që tronditi Francën dhe opinionin ndërkombëtar.

Ish-bashkëshorti i saj, Dominique Pelicot (Dominik Pelikot), u shpall fajtor për organizimin e përdhunimeve të saj për vite me radhë, ndërsa dhjetëra persona të tjerë u dënuan për përfshirjen në këtë skandal.

Në intervistën për televizionin publik France 5, 73-vjeçarja rrëfeu momentin kur policia i tregoi fotografitë që dokumentonin abuzimet, duke thënë se fillimisht nuk e njohu veten në to dhe përjetoi një tronditje të thellë psikologjike.

Ajo tregoi gjithashtu se, edhe pse kishte pasur disa dyshime gjatë viteve, nuk kishte mundur të imagjinonte kurrë përmasat e krimeve që po kryheshin ndaj saj.

Pelicot deklaroi se synon ta takojë ish-bashkëshortin në burg për ta pyetur personalisht pse e kishte bërë një gjë të tillë, duke e konsideruar këtë pjesë të procesit të saj të shërimit.

Ajo pranoi se skandali ka krijuar plagë edhe brenda familjes, duke theksuar se marrëdhëniet me fëmijët kërkojnë kohë për t’u rikuperuar.

Megjithatë, historia e saj është kthyer në një thirrje globale kundër dhunës seksuale, ndërsa mesazhi i saj “Turpi duhet të ndryshojë anë” është bërë simbol i lëvizjeve që kërkojnë drejtësi dhe mbështetje për viktimat.

Pelicot tha se sot synon të vazhdojë jetën dhe të ndihmojë në rritjen e ndërgjegjësimit publik, duke dëshmuar se edhe pas traumave më të rënda është e mundur të ringrihesh dhe të flasësh hapur për të vërtetën.