“Sa të jetë Marota, futbolli në Itali do të ketë manipulime”, Roberto Saviano akuza të forta: Kielini e di si funksionon me të

Fitorja 3-2 e Interit në “Derbin e Italisë” kundër Juventusit ka nxitur polemika të shumta lidhur me gjykimin e ndeshjes. Në qendër të debatit është arbitri Federiko La Pena, i cili rrezikon pezullim deri në një muaj pas vendimit për t’i dhënë kartonin e dytë të verdhë (dhe rrjedhimisht të kuq) mbrojtësit të Juventusit, Piere Kalulu.

Vendimi i diskutueshëm dhe reagimi i Rokit

Episodi kyç i takimit lidhet me një ndërhyrje të pretenduar ndaj mbrojtësit të Interit, Alesandro Bastoni. Sipas shefit të gjyqtarëve në Serisë A, Gianluka Roki, lojtari zikaltër kishte simuluar, çka ka shtuar dyshimet mbi saktësinë e vendimit të arbitrit. Ky pranim ka ushqyer më tej debatet në opinionin sportiv italian.

Pas ndeshjes, La Pena ka denoncuar në polici kërcënimet me jetë që ka marrë, ndërsa çështja pritet të shqyrtohet nga organet kompetente disiplinore.

Reagimi i Roberto Savianos

Në këtë klimë tensioni ka reaguar edhe gazetari dhe shkrimtari Roberto Saviano, i njohur për studimet e tij mbi ndikimin e mafies në Itali. Përmes kanaleve të komunikimit publik, Saviano ka ngritur akuza të forta në drejtim të presidentit të Interit, Xhuzepe Marota.

“Për sa kohë që ky njeri ka një rol në futbollin italian, të gjithë do të ndihen sikur liga është e manipuluar”, është shprehur Saviano. Ai shtoi se reagimi i drejtuesit të Juventusit, Xhorxho Kielini, “dukej si ndjenja e dikujt që e di se si funksionojnë gjërat me Marotën”, duke iu referuar faktit se Marota ka qenë Drejtor i Përgjithshëm i Juventusit nga viti 2010 deri në vitin 2018.

Akuzat për mungesë transparence

Saviano theksoi se kritikat e tij nuk synojnë lojtarët apo tifozët, por sistemin. “Ky nuk është një sulm ndaj atletëve dhe tifozëve, të cilët janë viktimat e para të një sistemi që nuk është plotësisht transparent. Për sa kohë që dinamika të caktuara mbeten të paprekshme, kampionatet nuk do të jenë kurrë vërtet normale”, deklaroi ai.

Më tej, ai përmendi edhe raste të dokumentuara të infiltrimit të organizatës kriminale ‘Ndrangheta në futbollin italian. Sipas Savianos, në një urdhër gjyqësor përmendet se “klubi i Interit ishte në një situatë nënshtrimi nga anëtarët e ‘Curva Nord’, duke përfunduar në mënyrë efektive duke i ndihmuar ata, megjithëse me ngurrim”.

Këto deklarata përbëjnë akuza të rënda, ndërsa deri më tani nuk ka pasur një reagim zyrtar nga Interi apo Xhuzepe Marota lidhur me to.

Debati përtej Italisë

Sipas raportimeve mediatike, polemikat nuk janë kufizuar vetëm në Itali. Në disa analiza jashtë vendit, gabimi i La Penës nuk po shihet thjesht si një lapsus njerëzor, por si pjesë e një sistemi që, sipas kritikëve, ndikohet nga faktorë me pushtet politik dhe ekonomik.

Çështja mbetet e hapur, ndërsa priten zhvillime si në planin disiplinor për arbitrin, ashtu edhe në reagimet institucionale ndaj akuzave të ngritura.