Szoboszlai në super formë me Liverpoolin

Kur mbërriti në “Anfield” në vitin 2023 nga RB Leipzig për 60 milionë paund, Szoboszlai mori fanellën me numrin 8 simbol i trashëgimisë së Steven Gerrard. Mesfushori hungarez, megjithatë, këmbëngul se po shkruan historinë e tij. Me 10 gola dhe shtatë asistime këtë sezon, ai është shndërruar në figurën qendrore të skuadrës, ndërsa vetëm Hugo Ekitike ka më shumë përfshirje në gola, dhe kapiteni Virgil van Dijk ka luajtur më shumë minuta.

Pavarësisht se jo gjithmonë aktivizohet në pozicionin e tij të preferuar si “numër 10”, Szoboszlai ka rritur ndjeshëm produktivitetin. Ai ka shënuar gola vendimtarë, përfshirë goditje dënimi spektakolare ndaj Arsenal dhe Manchester City, duke dëshmuar pjekuri dhe përgjegjësi në momente kyçe.

Trajneri Arne Slot vlerëson aftësinë e tij për të udhëhequr me shembull, edhe pse thekson se hapi i radhës është të bëhet më vokal në dhomat e zhveshjes, si Van Dijk.

Me kontratë deri në vitin 2028 dhe bisedime të nisura për rinovim, Liverpool e sheh 25-vjeçarin si lider të së ardhmes. Ish-trajneri Jurgen Klopp e quajti transferimin e tij “një nënshkrim për të tashmen dhe të ardhmen”, dhe kjo po rezulton e vërtetë. I ndikuar nga standardet e larta të Mohamed Salah dhe tashmë kapiten i Hungarisë që në moshën 22-vjeçare, Szoboszlai duket gati të bëjë hapin e madh drejt statusit të liderit absolut në “Anfield”.