Simeone kërkon ‘zjarrin’ e tifozëve

Atletico Madrid po përgatitet për ndeshjen e kthimit të fazës play-off në UEFA Champions League, ku në “Metropolitano Stadium” do të presë Club Brugge.

Pas barazimit spektakolar 3-3 në ndeshjen e parë, gjithçka mbetet e hapur për kualifikimin, ndërsa trajneri i madrilenëve, Diego Simeone, ka theksuar rëndësinë e mbështetjes së tifozëve.

“Ndeshja është e paparashikueshme, gjërat nuk shkojnë gjithmonë sipas planit.

Do t’i qasemi ndeshjes në një mënyrë që besojmë se do të jetë efektive.

Kemi nevojë për tifozët tanë, me atë energji që na ushqen”, u shpreh Simeone.

Tekniku argjentinas vlerësoi edhe kundërshtarin belg, duke paralajmëruar një përballje të fortë.

“Club Brugge është një ekip që luan mirë, janë të guximshëm dhe konkurrojnë fort, nën drejtimin e një trajneri që e bën punën e tij në mënyrën e duhur. Ata gjithmonë kanë performuar mirë sa herë që jemi përballur, qoftë atje apo në shtëpi.”

Simeone insistoi se skuadra duhet të përgjigjet në fushë me intensitet dhe përkushtim maksimal.

“Ne kemi nevojë për tifozët pranë ekipit, për energjinë e tyre. Dhe duhet ta kthejmë këtë mbështetje me punë, futboll dhe lojë të mirë. Nuk e di kurrë çfarë do të ndodhë, duhet të përshtatesh gjatë ndeshjes.”

Një natë e madhe pritet në Madrid, ku vetëm njëra skuadër do të sigurojë biletën për në fazën tjetër të Champions League.