Ministri italian bën thirrje për pezullimin e skemës së Sistemit të Tregtimit të Emetimeve të BE-së

Ministri italian për Ndërmarrjet, Adolfo Urso bëri thirrje për pezullimin e skemës së çmimit të karbonit të Bashkimit Evropian, Sistemit të Tregtimit të Emetimeve të BE-së (ETS), ndërsa blloku kërkon mënyra për të nxitur industritë e tij në vështirësi.

“Mekanizmi ETS, siç është sot, nuk është gjë tjetër veçse një taksë, një detyrim për kompanitë që përdorin shumë energji dhe që nuk janë më në gjendje të konkurrojnë”, tha sot Urso në Bruksel, përpara një takim të ministrave të BE-së përgjegjës për konkurrueshmërinë.

Sipas ETS, bizneset në sektorë të tillë si prodhimi i energjisë elektrike, prodhimi industrial dhe aviacioni duhet të blejnë leje për emetimet e tyre të gazrave serrë.

Sistemi aktualisht mbulon rreth 40% të totalit të emetimeve të BE-së.

Ndërsa industria e Evropës përballet me çmime relativisht të larta të energjisë, disa vende të BE-së po argumentojnë se çmimet e larta të energjisë, së bashku me kostot e certifikatave të emetimeve, janë një barrë e konsiderueshme për sektorët industrialë.

Urso tha se ETS po detyron zhvendosjen e prodhimit që përdor shumë energji jashtë Evropës dhe po nxit spekulimet financiare.

“Ne të gjithë duhet të jemi të vetëdijshëm se duhet të rishikohet në mënyrë thelbësore”,tha ai.

Megjithatë, ETS, e cila u prezantua për herë të parë më shumë se 20 vjet më parë, është vlerësuar si një nga nxitësit kryesorë të inovacionit, pasi i shtyn bizneset të aplikojnë për zgjidhje që reduktojnë emetimet.

Ministrja gjermane e Ekonomisë, Katherina Reiche mbështeti ETS-në, por tha se sistemi evropian i tregtimit të emetimeve duhej të zhvillohej më tej.

“Qeveria gjermane ishte në favor të një reforme të shpejtë”, tha ajo.

Komisioni Evropian po punon aktualisht për një vlerësim të planifikuar prej kohësh të ETS-së, dhe gjetjet e tij pritet të shpallen në muajt në vijim.