Kimish pas fitores në klasike: Nuk shënoj shpesh, kaq vonë në Dortmund është edhe më e veçantë

Pas fitores 3-2 në supersfidën ndaj BVB, Bajerni është i bindur se do ta mbrojë me sukses titullin. Bajerni i Mynihut praktikisht e vendosi garën për titull të shtunën në mbrëmje, siç e di shumë mirë edhe heroi i ndeshjes dhe kapiteni i kombëtares gjermane, Xhoshua Kimish.

“Po, në fund të fundit, gjithçka varet nga ne. Tani kemi një avantazh prej 11 pikësh dhe nuk do ta lëshojmë,” tha ylli i Bajernit. Asnjëherë më parë një epërsi prej njëmbëdhjetë pikësh nuk është shpërdoruar pas javës së 24. Kimish realizoi një goditje spektakolare me të majtën në minutën e 87 për t’i siguruar fitoren kampionëve rekord. Dortmundi kishte kaluar fillimisht në avantazh 1-0 para pushimit me anë të Niko Shloterbek (minuta 26), përpara se Herri Kejn (minutat 54 dhe 70) ta përmbyste rezultatin me dy gola të shpejtë. Barazimi i Daniel Svenson (minuta 83) zgjati shumë pak.

“Vuajtëm për një kohë të gjatë, ishte një ndeshje shumë fizike, gjithashtu një lojë me disa gabime. Sidomos pjesa e parë ishte shumë e çrregullt, me shumë ndërprerje, shumë goditje standarde, faulle, kështu që nuk u krijua një ritëm i vërtetë,” analizoi Kimish. Në pjesën e dytë, loja “rridhte pak më mirë”, pjesërisht sepse ai arriti ta mbante ritmin e lartë kundër BVB.

“Ata kanë pasur disa javë të vështira, me shumë ndeshje, ndërsa ne nuk i kemi pasur ato ndeshje. Prandaj ishim të vetëdijshëm se sa më shumë të zgjaste loja, aq më i madh do të ishte avantazhi ynë. Fatmirësisht arritëm ta shfrytëzojmë këtë avantazh shumë vonë në ndeshje,” tha kapiteni.

Sa i përket golit të fitores, Kimish u shpreh: “Nuk kisha shumë opsione në atë moment, thjesht u përqendrova të prekja mirë topin dhe për fat shkoi në rrjetë. Nuk shënoj shpesh, ndaj jam i lumtur për çdo gol. Të shënosh për 3-2 kaq vonë në Dortmund është sigurisht diçka shumë e veçantë.”