Komuna e Tetovës ndan mirënjohje për Shkëndijën për suksesin në Evropë!

Pasi të enjten mbyllëm aventurën evropiane, sot Shkëndija është vlerësuar nga Komuna e Tetovës për arritjet historike në Kupat e Evropës, duke i sjellë benefite të mëdha gjithë Ligës dhe klubeve tjera elitare në Maqedoninë e Veriut. 

Komuna e Tetovës me rastin e shënimit të Ditës së Komunës së Tetovës, 3 Marsi, ka nderuar sot KF Shkëndija me mirënjohje për përfaqësimin dinjitoz në garat ndërkombëtare dhe promovimin e qytetit dhe vendit në arenën evropiane.  

"Një vlerësim nga i cili lind natyrshëm një pyetje e thjeshtë:

Pse erdhi kjo mirënjohje dhe çfarë bëri Shkëndija për Tetovën dhe për Maqedoninë e Veriut këtë sezon?

Shkëndija u shpall kampione për herë të pestë në histori, duke siguruar pjesëmarrje në eliminatoret e UEFA Champions League. Në Evropë, kuqezinjtë eliminuan kampionin e Uellsit, The New Saints, ndërsa më pas realizuan një arritje historike duke mposhtur kampionin e Rumanisë, FCSB (ish-Steaua Bukuresht) ish-fitues të Kupës së Kampionëve Evropianë.

Kjo i garantoi klubit minimumin e pjesëmarrjes në UEFA Conference League, por Shkëndija nuk u ndal aty.

Përballjet me skuadra të nivelit të lartë si Qarabağ, Ludogoretsi Razgrad, Rayo Vallecano, Jagiellonia Białystok, Slovan Bratislava, AEK Larnaca dhe Shelbourne e vendosën emrin e Tetovës, Shkupit (ku kuqezinjtë i luajnë ndeshjet si vendas) dhe Maqedonisë së Veriut në hartën evropiane të futbollit.

Me 7 pikë të grumbulluara në fazën e ligës, Shkëndija arriti në “play-off” të Conference League, ku u përball me Samsunsporin e Turqisë. Ishte hera e parë që një klub nga Maqedonia e Veriut luante një ndeshje evropiane në pranverë, sukses ky më i madhi në historinë e klubit dhe arritja më e madhe e futbollit vendor në skenën ndërkombëtare në nivel klubesh.

Këto rezultate nuk ishin vetëm emocione sportive.

Ato sollën rritje të koeficientit të ligës vendore në ranglistën e UEFA-s, duke përmirësuar pozicionin e kampionatit nga fundi i renditjes evropiane dhe duke siguruar nga sezoni 2027 një vend shtesë në garat evropiane.

Pra, përfitimi nuk ishte vetëm i Shkëndijës, por i gjithë futbollit të Maqedonisë së Veriut.

Përmes fondit solidar të UEFA-s, përfitime financiare të konsiderueshme do të ndahen edhe për klubet e tjera të elitës vendore. Reputacioni ndërkombëtar, promovimi në transmetime evropiane, prezenca në rrjetet zyrtare të UEFA-s me gola, pritje dhe aksione të përzgjedhura, të gjitha këto kanë promovuar jo vetëm klubin, por edhe qytetin dhe shtetin.

Kur flitet për përfaqësim, për imazh dhe përfitime konkrete, përgjigjja është e qartë.

Shkëndija investon, Shkëndija garon, Shkëndija fiton dhe fiton i gjithë futbolli në Maqedoni të Veriut.

Kështu, rezulton se mirënjohja e Komunës së Tetovës erdhi me meritë dhe është një akt vlerësimi për një rrugëtim që ka sjellë krenari dhe benefite të prekshme për të gjithë", njofton KF Shkendija..