Argjentinë, përplasje mes qeverisë dhe federatës, ndalet futbolli

Futbolli argjentinas është paralizuar për shkak të një konflikti mes qeverisë dhe Federatës së Futbollit të Argjentinës (AFA). Liga profesionale e futbollit ka konfirmuar grevën e paralajmëruar për fundjavën e ardhshme, gjatë zhvillimit të javës së nëntë të ‘Torneo Apertura’ të Serisë A.

Ky veprim u shpall javën e kaluar për të treguar mbështetjen ndaj presidentit të AFA-s, Claudio “Chiqui” Tapia, i cili po hetohet për korrupsion bashkë me financiarin e federatës, Pablo Toviggino. Greva bie në të njëjtin moment kur Tapia dhe Toviggino janë thirrur për t’u dëgjuar nga drejtësia për një hetim mbi mashtrime fiskale.

Presidenti i AFA-s dhe ndihmësi i tij janë gjithashtu objekt i hetimeve për pastrim parash dhe keqpërdorim fondesh, ndërsa në ditët e fundit janë publikuar video që tregojnë lëvizje të mëdha parash në dorë që nuk janë deklaruar.

Federata e Futbollit ka reaguar duke akuzuar qeverinë për ndërhyrje në drejtësi dhe thekson se hetimet lidhen me kundërshtimin e Tapia ndaj projektit të presidentit Javier Milei, i cili synon të shndërrojë klubet nga pronësi e tifozëve (“socios”) në kompani private të hapura për investime të huaja.